Ishyirahamwe ry’Umupira w’Amaguru muri Senegal (FSF) ryemeje ko rizishyura amafaranga yose ryaciwe rikongeraho ay’abakinnyi n’abatoza, kubera ibihano bafatiwe kubera imvururu zaranze umukino wa nyuma w’Igikombe cya Afurika cya 2025 wabahuje nigihugu cya Morroco wabereye i Rabat ku wa 18 Mutarama 2026.
Mu mpera z’ukwezi gushize kwa Mutarama 2026, ni bwo Komisiyo ishinzwe Imyitwarire mu Mpuzamashyirahamwe y’Umupira w’Amaguru muri Afurika (CAF), yafatiye ibihano bikomeye Ishyirahamwe rya Ruhago muri Senegal.
Ni ibihano byo guhagarika Umutoza Pape Thiaw n’abakinnyi batandukanye ku mpande zombi, kubera imvururu zaranze umukino wa nyuma w’Igikombe cya Afurika cya 2025 wabereye i Rabat ku wa 18 Mutarama 2026.
FSF yemeye ibihano, itangaza ko itazabijuririra, ndetse ikazishyura amafaranga yaciwe, ikanongeraho ayaciwe umutoza n’abakinnyi bayo ari bo Ismaïla Sarr na Iliman Cheikh Baroy Ndiaye.
Yagize iti “Nyuma yo gusuzuma neza icyemezo, FSF yamenyesheje urwego rushinzwe ruhago kuri uyu mugabane ko itazajurira kubera ibihano byo guhagarikwa no gucibwa amande byayishyiriweho. Ibi kandi ni ko bimeze no ku bakozi bacu ari bo Pape Bouna Thiaw, Ismaïla Sarr na Iliman Cheikh Baroy Ndiaye.”
“Ishyirahamwe rya Ruhago muri Senegal ryemeje ko rizishyura byose birebana n’amafaranga ryategetswe ubwaryo, ayategetswe abatoza n’ayategetswe abakinnyi.”
Umutoza Pape Thiaw watangije imvururu asaba abakinnyi be kuva mu kibuga, yahagaritswe imikino itanu y’amarushanwa ya CAF, acibwa ibihumbi 100$ (asaga miliyoni 145 Frw).
Iliman Cheikh Baroy Ndiaye, yahagaritswe imikino ibiri ya CAF, ku myitwarire idakwiye yagaragaje imbere y’umusifuzi, mu gihe mugenzi we, Ismaila Sarr na we yahagaritswe imikino ibiri ku gikorwa nk’icyo.
FSF yaciwe ibihumbi 300$ (asaga miliyoni 435 Frw) kubera imyitwarire idakwiye y’abafana bayo bateje imvururu kandi ikaba ihabanye n’amahame ngengamyitwarire ya CAF.
Hari kandi FSF ibihumbi 300$ (asaga miliyoni 435 Frw) kubera imyitwarire y’abakinnyi n’abatoza b’Ikipe y’Igihugu yayo ndetse n’ibihumbi 15$ (miliyoni 21 Frw) ku myitwarire y’ikipe y’igihugu, aho hari abakinnyi batanu bahawe amakarita y’umuhondo icyo gihe.
About The Author
