Kuri uyu wa Kabiri tariki 11 Gashyantare NGABO Roben wari Communication Manager yatangaje ku mugaragaro ko yamaze gutandukana na Rayon sports, nkuko yabitangaje kurubuga rwe rwa X yahoze ari twitter.
Itangazo NGABO yashyize hanze riragaragaza urugendo yakoranye nikipe ya Rayon Sports mu gihe cy’imyaka 6 n’uruhare rwe muguteza imbere itumanaho n’imbuga nkoranyambaga by’iyi kipe.
Ngabo yakoreye Rayon Spots bakunze kwita Gikundiro mu bihe bibiri bitandukanye, bwa mbere byari muri 2018 kugeza 2020, yongera gukorana nayo kuva muri 2023 kugeza 2026, ibihe byaranzwe n’akazi kenshi, mu butumwa bwe, yagaragaje amarangamutima mu gihe yasezeraga ku ikipe .
Mu gihe k’imyaka 6 yari amaze akorera iyi kipe, Gikundiro yateye intambwe ikomeye mu iterambere ry’imbuga nkoranyambaga zayo, afatanyije n’itsinda ry’abakozi b’itumanaho, imbuga z’iyi kipe zakomeje kwaguka ku buryo abazikurikira barenga ibihumbi 440 kuri X (Twitter), Instagram na YouTube, uyu ukaba umusaruro w’ibikorwa bye.
Yashimangiye ko ibyagezweho byose bitari ibye wenyine, ahubwo byagezweho k’ubufatanye, agaragaza ko iterambere ryagezweho ryari umusaruro w’akazi ka buri wese, ibi byatumye Rayon Sports iba imwe mu makipe akurikirwa cyane mu karere.
M’ubutumwa bwe yanavuze ko hari ibihe bitoroshye baciyemo, yemeje ko ubuyobozi bw’ikipe bwafashe icyemezo cyo guhitamo indi nzira, icyemezo yavuze ko yubaha, anashimira amahirwe yahawe.
Nyuma yuko atandukanye na Rayon Sports, yatangaje ko yerekeje muzindi nshingano nshya nk’umunyamakuru wa siporo kuri Radio/TV10, atangira urundi rugendo mu mwuga we.
Ubutumwa bwe bwo gusezera buri kuvugisha abafana n’abakurikiranira hafi umupira w’amaguru hano mu Rwanda, benshi bashima uruhare rwe mu kuvugurura no guteza imbere itumanaho ry’ikipe ya Rayon Sports.
Ngabo Roben mbere yuko aba umuvugizi wa Rayon Sports yakoze kubinyamakuru bitandukanye nk’umunyamakuru wa siporo, aho yandikiye IGIHE, Umuseke, radio Isango Star, Radio/TV1, yakoze byigihe gito muri FERWAFA, usibye ibyo ni umufana wa Arsenal.
About The Author
