Kuri uyu mugoroba wo kuri uyu wa Gatatu tariki 13 Werurwe 2026 i Paris, Perezida Paul Kagame yitabiriye umukino wa UEFA Champions League wabereye kuri Parc des Princes, aho ikipe ifatanya na Visit Rwanda ari yo Paris Saint‑Germain yatsinze Chelsea FC ibitego 5–2.
Nyakubahwa Paul Kagame, ukunda cyane umupira w’amaguru, ejo yitabiriye umukino wo mu UEFA Champions League mu cyiciro cya 1/8 cy’irangiza, umukino ubanza wahuje Paris Saint‑Germain na Chelsea FC.
Ikipe ya Paris Saint-Germain, ifite igikombe giheruka, yatsinze Chelsea ibitego 5–2, ibyinshi muri byo ibitsinda mu minota ya nyuma, bityo ibona amahirwe akomeye mbere y’umukino wo kwishyura mu rugamba rwo kugera muri ¼ cy’irangiza .
Ikipe ya Paris Saint‑Germain kandi ni umufatanyabikorwa wa Visit Rwanda, mu kwamamaza ubukerarugendo bw’u Rwanda ku isi hose.
Rutahizamu w’Umunyajorijiya Khvicha Kvaratskhelia, winjiye mu kibuga asimbuye, yatsinze ibitego bibiri mu minota ya nyuma, bituma ikipe ye ibona intsinzi ikomeye. Imikinire ye myiza yamuhesheje igihembo cy’umukinnyi witwaye neza kurusha abandi muri uwo mukino.
Umukino warimo guhangana gukomeye, aho Bradley Barcola yabanje gufungura amazamu ku ruhande rwa PSG. Nyuma Malo Gusto na Enzo Fernández batsindiye Chelsea ibitego bibiri, bituma amakipe anganya 2–2.
Nyuma yaho, Vitinha yatsindiye igitego PSG bituma ijya imbere mu mukino, mbere y’uko Kvaratskhelia atsinda ibitego bibiri bya nyuma byahaye ikipe yo mu Bufaransa amahirwe akomeye mbere y’umukino wo kwishyura.
Ubu Paris Saint-Germain izajya i London gukina umukino wo kwishyura irimbere n’ibitego bitatu, mu gihe Chelsea FC igomba gukora ibishoboka byose kugira ngo isubize ibitego ikomeza icyizere cyo kugera muri ¼ cy’irangiza.
Nubwo Chelsea yagerageje kwishyura inshuro ebyiri muri uwo mukino, ubusatirizi bukomeye bwa PSG bwaje kuyitsinda imbaraga. Ubu igitutu kiri kuri Chelsea, izakira umukino wo kwishyura uzabera kuri Stamford Bridge mu cyumweru gitaha.
About The Author
