Mohamed Salah yatangaje ko azava muri Liverpool FC mu mpera za shampiyona ya 2025-2026, nyuma y’imyaka icyenda yari amaze muri iyi kipe.
Ikipe ya Liverpool yemeje ko habayeho ubwumvikane hagati yayo n’uyu mukinnyi w’imyaka 33, nubwo yari agifite amasezerano azarangira mu 2027.
Salah azava muri Liverpool ari umwe mu bakinnyi bakoze amateka akomeye, aho yatwaye ibikombe 8 birimo ibikombe bibiri bya shampiyona y’u Bwongereza ndetse na UEFA Champions League yo mu 2019. Ni uwa gatatu mu bakinnyi batsindiye Liverpool ibitego byinshi mu mateka, aho amaze gutsinda ibitego 255 mu mikino 435, akurikiye Ian Rush (346) na Roger Hunt (285).
Mu ntangiriro z’uyu mwaka w’imikino, ejo hazaza ha Salah muri Liverpool hari hatangiye gushidikanywaho nyuma y’ikiganiro yakoze avuga kuby’umubano we n’umutoza Arne Slot utarumeze neza.
Hari n’igihe atigeze ajya mu bakinnyi b’ikipe mu mikino itatu ikurikirana, ndetse ntiyigeze akina umukino wa Champions League batsinze Inter Milan 1-0.
Ariko nyuma ya AFCON, yongeye kujya mu bakinnyi bahora babanza mu kibuga, aho kuva muri Mutarama amaze gukina imikino 13.
Mu mwaka ushize, Salah yari ku rwego rwo hejuru cyane, aho yatsinze ibitego 29 anatanga imipira 18 yavuyemo ibitego, afasha Liverpool gutwara igikombe cya shampiyona mu mwaka wa mbere wa Arne Slot.
Ariko muri uyu mwaka, imikinire ye yagabanutse, aho amaze gutsinda ibitego 5 no gutanga imipira 6 mu mikino 22 ya shampiyona.
Mu butumwa bwe, Salah yavuze ko Liverpool izahora ari iwe agira ati:
“Gusezera ntabwo byoroshye. Iyi kipe izahora ari iwacu. Mwamfashije kubona ibihe byiza kurusha ibindi mu buzima bwanjye. Nzahora ndi umwe muri mwe.”
Yashimiye cyane abafana, bagenzi be bakinnyi n’abayobozi b’ikipe ku nkunga bamuhaye mu bihe byiza n’ibigoye.
Salah asize amateka akomeye muri Liverpool, aho yabaye umwe mu bakinnyi batanze ibyo bari bafite mu bihe bya vuba. Abafana benshi bamufata nk’ikirangirire cy’iyi kipe, kandi bazakomeza kumwibuka nk’umwe mu bakinnyi beza bayikiniye.
About The Author
