I Rwanda ruzindutse rwizihiza Umunsi w’Intwari z’Igihugu kuri uyu wa 1 Gashyantare 2026, amaso y’abatari bake akomeje guhangwa ku gasozi ka Nyabwishongwezi mu Karere ka Nyagatare.
Aka gasozi, kamenyekanye cyane nk’ahaguye Maj. Gen. Fred Gisa Rwigema, ntikagifatwa nk’ahantu nyaburanga gusa, ahubwo kamaze guhinduka ishuri ryo ku rwego rwo hejuru ku bifuza kwiga ubutwari n’urukundo rw’igihugu.
Isomo ry’ubwitange ku bakiri bato
Abasura aka gasozi bemeza ko kuhagera bitanga ishusho n’imbaraga birenze gusoma amateka mu bitabo. Mupenzi Jean Damascene, umwe mu bahasuye aturutse i Kamonyi, asobanura ko Nyabwishongwezi imwubakamo “ishyaka ridasanzwe”.
“Aha si agasozi gusa, ni ishuri. Ni ho wigira uburyo umuntu ashobora gusiga byose akitangira igihugu cye. Kuhagera bituma usobanukirwa umutima w’ubutwari Maj. Gen. Rwigema yari afite.” — Mupenzi J. Damascene.
Ku rubyiruko nka Mutoniwase Daria, gusura uyu musozi kwabaye amahirwe yo guhura n’amateka imfura n’imbata. Avuga ko ibiganiro yagiranye n’abahatuye bamuzi ndetse n’ababanye na we mu buhungiro, byatumye arushaho gusobanukirwa isezerano Gen. Rwigema yahaye Abanyarwanda ryo kubacyura mu rwa Gasabo.
Inyungu ku baturage no ku bukungu bw’amateka
Abaturage bo mu bice bya Kagitumba, Matimba na Nyabwishongwezi ntibakibona aka gasozi nk’urwibutso rw’agahinda, ahubwo bakabona nka mbaturabaho mu bukungu n’ishema ry’akarere kabo.
Ikimenyetso cy’amateka
Abaturage bishimira ko icyifuzo cyabo cyo gushyira ikimenyetso kigaragara kuri uyu musozi cyashubijwe.
Iterambere
Tutabayiro Godfrey, umwe mu bahatuye, avuga ko gusurwa n’abantu benshi bituma binjiza amafaranga binyuze mu bikorwa by’ubucuruzi n’izindi serivisi abashyitsi bakenera.
Umuyobozi w’Akarere ka Nyagatare Wungirije ushinzwe Iterambere ry’Ubukungu, Matsiko Gonzague, ashimangira ko aka karere gafite umwihariko mu mateka yo kubohora igihugu.
Usibye Nyabwishongwezi, uyu mujyi unazwiho kugira agace k’”Agasantimetero” ubutaka bwa mbere Ingabo za RPA zateweho budasubira inyuma.Matsiko akomeza ashishikariza abakiri bato gusura aya mateka kugira ngo bamenye agaciro k’amahoro igihugu gifite uyu munsi.
Icyitonderwa:
Ku rwego rw’Akarere ka Nyagatare, ibirori byo kwizihiza Umunsi w’Intwari uyu munsi biri kubera mu Murenge wa Tabagwe.
About The Author
