Kuri uyu wa 13 muri kaminuza y’u Rwanda Ishami rya Huye hari kubera ibirori byo gutangira icyerekezo gishya cyafunguriwe abanyeshuri ba Kaminuza y’u Rwanda mu ishami ry’ubuzima CMHS birori bya White Coat Ceremony 2026.
Ibi birori byitabiriwe n’abayobozi batandukanye, ababyeyi, abanyamakuru, ndetse n’abanyeshuri ba nyir’ukubitegurirwa. Mubayobozi bitabiriye ibi birori harimo n’uhagarariye ibitaro bikuru bya kaminuza CHUB.
Ibi birori byahurije hamwe abanyeshuri barimo bitegura kwinjira mu rugendo rwo kuvura no gufasha abatuye isi, baturutse mu mashami ya Medicine and Surgery, Pharmacy, ndetse na Clinical Psychology.
Ibirori byatangijwe n’umushyushyarugamba (MC) Maurice Ishimwe, washyuhije abitabiriye ibi birori mu mwuka w’ibirori.
Yatangiye aha ikaze abanyeshuri, ababyeyi, n’abayobozi b’amashami atandukanye, akomoza ku kamaro ka White Coat nk’ikimenyetso cy’ubudahemuka, isuku, n’ubutumwa bwera bwo kurengera ubuzima.
Nyuma yo gufungura ibirori, habayeho umwanya w’isengesho ryo gushimira Imana no kuyisaba umuremyi kuyobora intambwe z’aba baganga b’ejo hazaza.
Nyuma y’isengesho, Umuyobozi ushinzwe imibereho myiza y’abanyeshuri (Dean of Student Welfare) yafashe ijambo, ashimira abanyeshuri ku bw’intambwe bateye.
Yabibukije ko uyu mwenda bambikwa atari umugenzo gusa, ahubwo ari inshingano ikomeye basinyira imbere y’imbaga, abasaba kurangwa n’ikinyabupfura n’ubwitange mu mirimo yabo.
Kimwe mu bice cyari gishimishije cyane ni ijambo ryatanzwe na Octave Iragena, wavugaga mu izina ry’abanyeshuri bose (Speech of White Coat Ceremony).
Mu ijambo rye ririmo amarangamutima n’icyizere, Octave yagize ati:“Uyu mwambaro w’umweru twambaye uyu munsi ntabwo ari umurimbo, ahubwo ni igihango tugiranye n’abaturage b’u Rwanda n’isi yose. Ni isezerano ryo kuzakoresha ubumenyi twakura muri aya mashami yacu—Medicine, Pharmacy, na Clinical Psychology,kugira ngo tugarure icyizere aho cyari cyarayoyotse.”
Yashimiye ababyeyi n’abarimu bakomeje kubaba hafi, asezeranya ko we n’abagenzi be bazaharanira kurangwa n’ubunyamwuga mu gukiza imiringa n’indwara zo mu mutwe, ndetse no gutanga imiti ikwiye mu buryo bw’ubuhanga.Ibi birori byakomeje mu mwuka w’ibyishimo, aho abanyeshuri berekana ko biteguye gushyira mu bikorwa indahiro y’ubuvuzi basinyiye uyu munsi.
Ibirori birakomeje!…………………
About The Author
