Ikipe ya Police FC yegukanye Igikombe cy’Intwari 2026 nyuma yo gutsinda APR FC kuri penariti 7-6, mu mukino wa nyuma wabaye kuri iki Cyumweru muri Stade Amahoro, urangira amakipe yombi anganyije 1-1 mu minota 90 isanzwe y’umukino bitabaza Penariti.
Iyi nsinzi Police FC iyikesheje uruhare rukomeye rw’umunyezamu Niyongira Patience, wakuyemo penariti y’ingenzi, nyuma yo kwinjira mu kibuga mu minota ya nyuma y’umukino agamije kwifashishwa mu gutera penariti.
Umukino watangiye amakipe yombi yigengesera, nubwo APR FC yagaragaje imbaraga mu guhererekanya umupira no kugera imbere y’izamu mu minota ya mbere. Ku munota wa 4’, APR FC yabonye kufura Ruboneka Jean Bosco yateye, Niyigena Clement ashyiraho umutwe umupira unyura hafi y’izamu.
Police FC na yo yagiye ibona amahirwe atandukanye, aho ku munota wa 18’ Ishimwe Christian yarekuye ishoti ryoroheje ryashyizwe muri koroneri n’umunyezamu Ishimwe Pierre, Nsabimana Eric ‘Zidane’ ashyiraho umutwe umupira unyura ku ruhande rw’izamu.
Mu minota ya nyuma y’igice cya mbere, umunyezamu Rukundo Onesme yatabaye Police FC inshuro nyinshi, by’umwihariko ku munota wa 45+1’ akuramo ishoti rikomeye rya William Togui, igice cya mbere kirangira amakipe anganya 0-0.
Igice cya kabiri cyatangiranye imbaraga nyinshi. Ku munota wa 52’, William Togui yatsinze igitego cya mbere cya APR FC ku mupira wahinduwe na Hakim Kiwanuka, awutera adahagaritse arawuhindukiza awushyira mu izamu, bituma abafana ba APR FC banyeganyega.
Police FC yakomeje gusatira ishaka kwishyura, iza kubigeraho ku munota wa 69’, ubwo Gakwaya Leonard yatsindaga igitego cyo kwishyura ku mupira watakajwe na Ishimwe Pierre nyuma yo kuwurwanira na myugariro Nshimiyimana Yunusu.
Iminota ya nyuma yaranzwe n’amahirwe ku mpande zombi, aho ku munota wa 89’ APR FC yibuze igitego ku mutwe wa Mamadou Sy unyura hafi cyane y’izamu.
Ku munota wa 90+2’, Police FC yakoze impinduka ikomeye ikuramo umunyezamu Rukundo Onesme ishyiramo Niyongira Patience, agamije gufasha mu gutera penariti.
Umukino warangiye amakipe anganya 1-1, hitabazwa penality.
APR FC ni yo yabanje gutera penariti. Uko zakurikiranye, amakipe yombi yagiye yinjiza izazo, ariko haza kubamo amakosa menshi ku mpande zombi.
Ibyahinduye isura y’umukino ni penariti ya 9 ya APR FC, aho Ronald Ssekiganda yayiteye Niyongira Patience ayikuramo, bituma Police FC itangira guhabwa amahirwe yo kwegukana intsinzi.
Kuri penariti ya 10, David Chimezie yateye neza ayinjiza, ihita ihesha Police FC intsinzi ya 7-6 n’Igikombe cy’Intwari 2026.
About The Author
