Ikipe ya AS Monaco yafashe icyemezo cyo gusesa amasezerano yari afitanye na Paul Pogba, umukinnyi wabaye intwari mu Gikombe cy’Isi cya 2018. Aya masezerano yagombaga kurangira mu mpeshyi y’umwaka utaha. Biteganyijwe ko impande zombi zizumvikana ku bijyanye n’amafaranga mbere yo gusesa ayo masezerano burundu, byatangajwe na Le Parisien Sports, kuri uyu Kabiri tariki 11 Kanama 2026 saa 18:59.
Ese iyi ni yo maherezo ya Paul Pogba muri football? Nk’uko ikinyamakuru Nice-Matin cyabanje kubitangaza, amakuru yashoboye kwemezwa avuga ko AS Monaco ishaka gusesa amasezerano ifitanye n’uyu wahoze ari umukinnyi w’ikipe y’igihugu y’u Bufaransa. Pogba afite imyaka 33, kandi yongeye kugira imvune mu myitozo yo kuri uyu wa Kabiri, aho yakomeretse ku mutsi w’itako ry’ibumoso.
Ariko icyemezo cyo gutandukana n’uyu mukinnyi ngo cyari cyafashwe mbere y’uko agira iyi mvune nshya. Biteganyijwe ko hazabaho ubwumvikane ku mafaranga azahabwa Pogba, cyane cyane ku mishahara y’amezi yari asigaye ku masezerano ye. Ibyo bigomba kuba byarangiye mbere y’uko igihe cyo kugura no kugurisha abakinnyi kirangira ku wa 1 Nzeri.
AS Monaco yabajijwe kuri iki kibazo, ariko ntiyashatse kugira icyo itangariza itangazamakuru.
Paul Pogba yari yarasinyiye AS Monaco ku buntu muri Nyakanga 2025, nyuma y’uko yari amaze amezi arenga atandatu avuye muri Juventus Turin, agamije kongera gutangira neza umwuga we w’umupira w’amaguru.
Ariko yakomeje kugira ibibazo by’imvune ndetse no kubura umwanya uhagije wo gukina. Kugeza ubu, yakinnye iminota 115 gusa mu mikino itandatu, aho umukino umwe gusa ari wo yatangiye mu kibuga kuva ku munota wa mbere. Uwo mukino wabaye ku wa 2 Gicurasi, Monaco ikina na Metz.
Mu gihe cyo kwitegura shampiyona nshya, Pogba yakinnye igice kimwe gusa cy’umukino wa gicuti wahuje Monaco na Saint-Priest, ikipe ikina muri National 2 mu Bufaransa.
Ntabwo yitabiriye indi mikino ya gicuti kubera ikibazo cy’ivi ry’iburyo ryakomeje kumubangamira. None yongeye kugira imvune nshya ku itako ry’ibumoso kuri uyu wa Kabiri.
Kuri uwo munsi nyuma ya saa sita, Pogba yakorewe MRI kugira ngo abaganga bamenye neza uburemere bw’iyi mvune nshya.
About The Author
