Manchester City na Real Madrid bagiye kongera guhurira mu mikino ya kamarampaka ya UEFA Champions League ku nshuro ya gatandatu kuva mu mwaka wa 2019-20, nyuma y’uko tombola yo ku wa Gatanu ibashyize hamwe muri 1/8 cy’irangiza, ndetse hanategurwa uko 1/4 na 1/2 bizagenda.
Aya makipe abiri akomeye yari asanzwe yarahuye no muri uyu mwaka w’imikino, aho Manchester City yatsinze Real Madrid ibitego 2-1 mu mukino w’icyiciro cya shampiyona wabaye mu Ukuboza. Ni ubwa mbere mu mateka ya Champions League amakipe abiri agiye guhura mu mikino ya kamarampaka mu bihe bitanu bikurikirana.
Umutoza wa Manchester City, Pep Guardiola, yavuze ko gukina n’amakipe akomeye ari amahirwe yo kwiga no kurushaho gukomera mu gihe kizaza.
Ikipe ibitse igikombe, Paris Saint-Germain (PSG), izahura na Chelsea, mu mukino usubiramo ihangana rikomeye ryabaye mu mukino wa nyuma w’Igikombe cy’Isi cy’Amakipe umwaka ushize, aho Chelsea yatsinze.
Umutoza wa Chelsea, Liam Rosenior, yavuze ko yishimiye guhura na PSG kuko ari ikipe akunda kandi azi neza kuko yigeze gukina mu Bufaransa.
Arsenal izahura na Bayer Leverkusen. Kuba yaratsinze imikino umunani yose mu cyiciro cya shampiyona byatumye iyobora urutonde, bityo irinda guhura n’amakipe akomeye hakiri kare.
Niba Arsenal iramutse ikomeje muri 1/4, izahura na Sporting cyangwa Bodo/Glimt. Andi makipe akomeye arimo Real Madrid, Manchester City, PSG, Liverpool, Bayern Munich na Chelsea ari ku rundi ruhande rw’ishushanyo.
Umutoza wa Arsenal, Mikel Arteta, yavuze ko bishimiye kugera aho bageze kuko babikoreye mu mikino y’amatsinda.
Iyi tombola yitezweho imikino ikomeye cyane, aho amakipe akomeye i Burayi azahatanira kugera ku mukino wa nyuma wa UEFA Champions League.
Dore uburyo amakipe azahura muri Round of 16 ya UEFA Champions League bahatanira kuzajya kuri final muri Budapest-Hungary:
- Paris Saint-Germain (PSG) vs Chelsea
- Galatasaray vs Liverpool
- Real Madrid vs Manchester City
- Atalanta vs Bayern Munich
- Newcastle United vs FC Barcelona
- Atlético Madrid vs Tottenham Hotspur
- Inter Milan vs Sporting CP
- Bayer Leverkusen vs Arsenal
Amakipe azatsinda aya majonjora azakomeza muri 1/4, hanyuma akomeze mu 1/2 kugeza ku mukino wa nyuma uzabera i Budapest
About The Author
