Isiganwa Mpuzamahanga rya Kigali ry’Amahoro rya Kigali International Peace Marathon rirkuba ku nshuro ya 21 ryatangiye neza cyane kuri uyu munsi ryabereye i Kigali tariki 13 Kamena 2026 , aho abasiganwa barenga 5,000 baturutse mu bihugu 65 bitabiriye Isiganwa rya Kilometero 10 ry’Amahoro rifite inyito ya Run for Peace.
Iri siganwa ryatangiriye kandi risorezwa kuri Stade Amahoro i Kigali, rishyiraho agahigo gashya k’umubare w’abaryitabiriye ku munsi wa mbere, rinashimisha cyane abasiganwa n’abafana bari baje kubashyigikira.
Ryatangijwe mu mwaka wa 2005, Isiganwa Mpuzamahanga rya Kigali ry’Amahoro ryavutse nyuma ya Jenoside yakorewe Abatutsi mu 1994 nk’ikimenyetso cy’icyizere, gukira ibikomere no kubaka ubwiyunge mu gihugu.
Ritegurwa n’Ishyirahamwe ry’Imikino Ngororamubiri mu Rwanda (RAF) ku bufatanye na Minisiteri ya Siporo (MINISPORTS), rikaba rikoresha siporo nk’ururimi ruhuza abantu mu guteza imbere amahoro, ubumwe no gukira ibikomere by’amateka haba mu Rwanda no ku rwego mpuzamahanga.
Insanganyamatsiko ya RunForPeace igaragaza neza ubutumwa bw’iri siganwa bwo guhuza abantu, kwizihiza ubudahangarwa, guteza imbere ubuzima bwiza no gushimangira ubufatanye bw’abatuye isi.
Uyu munsi, isiganwa ryatangijwe ku mugaragaro n’abayobozi bakuru barimo Minisitiri wa Siporo, Nelly Mukazayire, na Minisitiri w’Ubuzima, Dr. Sabin Nsanzimana, bashishikarije abaryitabiriye kwita ku buzima bw’umubiri n’ubwenge no kwimakaza umuco w’ubumwe.
Ku nshuro ya mbere, iri siganwa riri kuba mu minsi ibiri 13–14 Kamena 2026, hagamijwe gutuma abantu benshi baryitabira.
Ku wa Gatandatu, 13 Kamena: Habaye isiganwa rya Kilometero 10 ry’Amahoro ritarimo guhatanira ibihembo, ryamaze gukorwa kandi ryitabiriwe ku bwinshi.
Ku Cyumweru, 14 Kamena: hari: isiganwa rya Kilometero 21.1 Half Marathon, n’isiganwa rya Kilometero 42.195 Full Marathon
Abasiganwa barenga 4,000 bamaze kwiyandikisha kugira ngo bitabire aya marushanwa akomeye.
Biteganyijwe ko aya masiganwa azitabirwa n’abakinnyi b’indobanure bo muri Afurika y’Iburasirazuba, bikomeza kongera isura n’icyubahiro by’iri rushanwa ku rwego mpuzamahanga.
About The Author
