Gutandukana hagati y'itsinda rya Vestine na Dorcas hamwe na MIE

Mu itangazo ryashyizwe ahagaragara n’abahanzi Vestine na Dorcas, aba bakobwa bamenyesheje abakunzi b’umuziki ko basezeye ku masezerano y’imikoranire bari bafitanye n’inzu ifasha abahanzi ya MIE.

Nk’uko byasobanuwe muri iyi baruwa, uyu mwanzuro uje nyuma yo kubitekerezaho neza no kubyigaho. Aba bahanzi bashimangiye ko uyu mwanzuro wo guhagarika imikoranire uhita utangira gukurikizwa guhera uyu munsi.Mu magambo yabo, Vestine na Dorcas bagaragaje ishimwe rikomeye ku nzu ya MIE.

Bavuze ko MIE yabaye umugisha kuri bo, kandi ko yagize uruhare rukomeye mu kubatoza, kubafasha, no kubarinda mu rugendo rwabo rw’umuziki kuva bakiri bato. Bavuze ko bazahora bazirikana ubufasha n’amahirwe bahawe n’iyo nzu.Aba bahanzi basobanuye ko uyu mwanzuro bawufashe mu rwego rwo gushaka kwisanzura no gukomeza urugendo rwabo rw’ubuhanzi mu buryo bwigenga, bunoze, kandi buhuye n’icyerekezo ndetse n’indangagaciro bafite.

Nubwo batandukanye na MIE, Vestine na Dorcas bashimangiye ko nta mwiryane uhari, ahubwo ko bakomeje kubaha no gushimira ikipe yose ya MIE, bakaba banabifuriza intsinzi mu bikorwa byabo by’ahazaza.Mu butumwa bageneye abafana babo, aba bahanzi babashimiye ku bw’urukundo n’ubufasha bakomeje kubagaragariza mu gihe cyose cy’urugendo.

Basoje bamenyesha abafana ko ibi atari byo birangiye, ahubwo ko ari intangiriro y’igice gishya mu muziki wabo, kandi ko biteguye gusangira nabo iby’ahazaza.

Ni amakuru ikipe ya MIE Empire itaragira icyo itangazaho ku mbuga nkoranyambaga za bo.