Stade ya Santiago Bernabéu yakiriye ikirori cy’umupira w’amaguru kuri uyu wa Gatandatu, tariki ya 13 Kamena 2026, ubwo Abakanyujijeho ba Real Madrid batsindaga Abakanyujijeho ba Inter Milan ibitego 2-1 mu irushanwa rya 13 rya Corazón Classic Match. Uyu mukino wateguwe na Fondasiyo ya Real Madrid ku nsanganyamatsiko igira iti “Un partido con alma de infancia” bisobanuye umukino wishyaka ryacyana, uhuza kwibuka ibihe byiza by’umupira n’intego yo gufasha imibereho myiza y’abatishoboye.
Corazón Classic Match ni umukino wari ufite intego yo gukusanya inkunga igenerwa imishinga y’imibereho n’imikino ya Fondasiyo ya Real Madrid. Iyi mishinga ifasha abana n’imiryango itishoboye hirya no hino ku isi, ikagera ku bantu bagera ku 400,000 mu bihugu bisaga 100 binyuze mu mishinga irenga 1,400 y’uburezi n’iterambere.
Muri uyu mwaka, Inter Milan ni yo yari yatumiwe kugirango ikine na Real Madrid, ikaba yari yongeye kwitabira iri rushanwa nyuma yo kurikina bwa mbere mu 2014. Amafaranga yakusanyijwe muri uyu mukino azafasha gukomeza ibikorwa by’iyi fondasiyo.
Abaterankunga n’abafatanyabikorwa batandukanye, barimo Fiesta, Miscota n’izindi sosiyete, hamwe n’inzego za Madrid, bagize uruhare mu gutuma uyu mukino uba.
Uyu mukino wabakanyujijeho waranzwe n’ishyaka, ubuhanga bikwiye amakipe abiri afite amateka akomeye ku mugabane w’u Burayi.
Inter Legends ni yo yafunguye amazamu ku munota wa 41 ku gitego cyatsinzwe na Hernanes, agaragaza ko agifite ubuhanga bwamuranze mu kibuga hagati.
Mu gice cya kabiri, Real Madrid Leyendas yagarutse mu mukino. Ku munota wa 69, myugariro Pepe yatsinze igitego cyo kwishyura, agaragaza imbaraga n’umuhate byamuranze mu bihe bye byiza.
Nyuma y’iminota itandatu gusa, ku munota wa 75, Barral yatsinze igitego cy’intsinzi, aha Real Madrid Leyendas intsinzi y’ibitego 2-1.
Mu ikipe ya Real Madrid Leyendas harimo abakinnyi bazwi nka Bizzarri, Karembeu, Coentrão, Makelele na Pedro León. Iyi kipe yatozwaga na José Antonio Camacho na Manolo Castro.
Ku ruhande rwa Inter Legends, hagaragayemo ibyamamare nka Javier Zanetti, Esteban Cambiasso, Francesco Toldo, Maicon, Lúcio n’abandi benshi, bazanye ubunararibonye n’ubuhanga byaranze umupira w’u Butaliyani.
Abafana bari muri Santiago Bernabéu ndetse n’abakurikiye umukino kuri Real Madrid TV bishimiye umukino urimo gusatirana hagati y’impande zombi. Nubwo wari umukino wa gicuti, abakinnyi bawukinnye bishimye kandi bafite ishema ryo kongera gukandagira kuri iki kibuga cy’amateka.
Iyi ntsinzi yongeye kongera agaciro ka Corazón Classic Match nk’umukino ngarukamwaka uhuza amateka y’umupira w’amaguru no gufasha ibikorwa by’urukundo. Mu myaka yashize, iri rushanwa ryakiniwemo n’andi makipe akomeye yo ku mugabane w’u Burayi, rikaba rituma habaho ubucuti n’ubufatanye hagati y’amakipe.
Ku bakinnyi benshi, byabaye amahirwe yo kongera kwibuka ibihe byiza bagiriye kuri Santiago Bernabéu imbere y’abafana babakunda.
About The Author
