Ikipe ya Sunrise FC yatsinze APR FC igitego 1-0 mu mukino wa gicuti wabaye ku wa Gatandatu, tariki ya 15 Kanama 2026, kuri Sitade ya Nyagatare, izwi kandi nka Gologota cyangwa Gorogota, mu Karere ka Nyagatare.
Igitego rukumbi cyabonetse muri uyu mukino cyatsinzwe na Ndikumana Arteta wahoze muri Gicumbi FC ku munota wa 15, maze Sunrise FC ikomeza kuyobora umukino kugeza urangiye. Igice cya mbere cyarangiye ari igitego 1-0, ari na yo ntsinzi yabonetse ku musozo w’umukino.
APR FC, izwi nka “Club Giant” ndetse ikaba ari na yo yegukanye igikombe cya Shampiyona y’u Rwanda cya 2025-2026, yari yagiye i Nyagatare mu rwego rwo kwitegura umwaka mushya w’imikino.
Uyu mukino wari umwe mu mikino ya gicuti APR FC iri gukina mbere yo gutangira shampiyona. Mbere yaho, iyi kipe yari yaritwaye neza itsinda amakipe arimo Mathare United na Etincelles FC, bityo gutsindwa na Sunrise FC bikaba bibaye kimwe mu bisubizo bitari bisanzwe muri iki gihe cyo kwitegura.
Sunrise FC, ikorera mu Karere ka Nyagatare, yishimiye iyi ntsinzi ibinyujije ku mbuga nkoranyambaga zayo, ishimangira igitego cya Ndikumana Arteta cyabonetse hakiri kare. Abaturage bo mu Ntara y’Iburasirazuba na bo bagaragaje ko bishimiye uyu mukino.
Nubwo uyu mukino utatangaga amanota, amakipe yombi yawuvanyemo amasomo azayafasha mu mwaka mushya w’imikino. APR FC izashaka kwisubiraho mu mikino itaha ya gicuti, mu gihe Sunrise FC izakomeza gukura icyizere mu kuba yatsinze imwe mu makipe akomeye mu Rwanda.
About The Author
