Mu ijoro ryo kuri uyu wa Kabiri, Doja Cat arimo gukorera igitaramo cy’amateka muri BK Arena, Iki gitaramo cyari kimwe mu bigize urugendo arimo rw’ibitaramo bizenguruka Isi yise ‘Tour Ma Vie World Tour’.
Uru ruhererekane rw’ibitaramo Doja Cat yarutangiriye mu Mujyi wa Auckland muri Nouvelle-Zélande ku wa 18 Ugushyingo 2026, bikazakomereza mu yindi mijyi nka Pretoria muri Afurika y’Epfo, Dublin muri Ireland, Glasgow na Manchester mu Bwongereza n’i Lisbon muri Portugal. Azabisoza ku wa 1 Ukuboza mu 2026, i New York muri Leta Zunze Ubumwe za Amerika.
Igitaramo cya Doja Cat i Kigali cyateguwe ku bufatanye n’umuryango Global Citizen utegura ibitaramo bya MoveAfrika, bigiye kubera i Kigali ku nshuro ya gatatu. Icya mbere cyatumiwemo Kendrick Lamar, icya kabiri hatumirwa John Legend.
Umuhanzikazi w’Umunyamerika wegukanye igihembo cya Grammy, Doja Cat, ni we wayoboye (headline) igice cya gatatu cya Move Afrika, cyabereye i Kigali muminsi irimbere azajya muri Pretoria muri Werurwe.
Move Afrika ni urugendo rw’ibitaramo bya muzika rukomeje kwaguka ku rwego rwa Afurika, ruyobowe na Global Citizen. Rutegurwa buri mwaka ku bufatanye na pgLang, sosiyete y’ubuhanzi yashinzwe na Kendrick Lamar.
Doja Cat yatangiriye urugendo rwe rwa Move Afrika i Kigali kuri BK Arena ku itariki ya 17 Werurwe, nyuma ajye i Pretoria muri Afurika y’Epfo aho azataramira kuri SunBet Arena.
Igitaramo cya Kigali cyateguwe ku bufatanye n’Ikigo cy’Igihugu gishinzwe Iterambere ry’u Rwanda Development Board (RDB).
Move Afrika ni gahunda ya Global Citizen igamije guhangana n’ubusumbane buri ku isi, ishyiraho amahirwe y’akazi n’ubucuruzi ku rubyiruko rwo ku mugabane wa Afurika. Ibi bikorwa binyuze mu bitaramo bya muzika biba buri mwaka.
Ibi bitaramo bigaragaza impano z’abanyafurika ku rwego mpuzamahanga, bikazana ishoramari rifasha iterambere ry’aho bibera. Binatanga amahirwe ku bahanzi, abacuruzi, ibigo bitandukanye ndetse n’abakozi b’aho bibera, harimo n’amahugurwa y’akazi mu buryo bufatika. Move Afrika igamije kandi kuzamura urwego rw’imyidagaduro ku mugabane, igakurura abahanzi mpuzamahanga n’abo mu karere kuza gutaramira muri Afurika, ndetse ikanubaka ubushobozi bw’imijyi yakira ibi bitaramo.
Buri mwaka, ibihugu bishya bizajya byongerwa muri uru rugendo rwa Move Afrika, rukazagenda rwaguka ku mugabane mu gihe cy’imyaka itanu iri imbere.
Mu mwaka wa 2025, Move Afrika yakoze ubukangurambaga buyobowe n’abaturage bugamije iterambere rirambye n’izamuka ry’ubukungu, hibandwa cyane ku gushimangira urwego rw’ubuzima muri Afurika. Bafatanyije n’abandi bafatanyabikorwa, Global Citizen yasabye ibihugu bya Afurika kongera ingengo y’imari igenerwa ubuzima, gushyira imbere ubuvuzi bw’ibanze n’uburenganzira ku buzima bw’imyororokere, kongera ishoramari mu kurwanya ibibazo by’ubuzima, no kugabanya imizigo y’imari ibihugu byikoreye kugira ngo ubuzima rusange burusheho gukomera.
Igikorwa cya mbere cya Move Afrika cyabereye i Kigali mu Ukuboza 2023 cyiswe Move Afrika: Rwanda, cyari kiyobowe n’umuhanzi w’icyamamare Kendrick Lamar wegukanye ibihembo bya Grammy na Pulitzer. Iki gikorwa cyibanze ku guhanga imirimo, guhugura urubyiruko no guteza imbere ubucuruzi bwabo.
Icyo gitaramo cyahaye akazi Abanyarwanda barenga 1,000, kandi 75% by’abakozi n’abatekinisiye bari ab’imbere mu gihugu. Cyavuzweho kuba ari kimwe mu bitaramo bikomeye byabereye mu Rwanda, ndetse cyitabiriwe n’abahanzi barimo Zuchu, Bruce Melodie, DJ TOXXYK, Sherrie Silver, Ariel Wayz, Kivumbi King na Bruce The 1st.
About The Author
