Abahagarariye Minisiteri y’Ububanyi n’Amahanga y’u Rwanda na Minisiteri y’Ububanyi n’Amahanga ya Uganda bahuriye mu nama ya Komisiyo Ihoraho Ihuriweho (JPC) iri kubera mu mujyi wa Kampala, aho bagaragaje ubushake bwo gukomeza guteza imbere umubano mwiza ushingiye ku buvandimwe hagati y’ibihugu byombi.
Iyi nama ibaye ku nshuro ya 12, ikaba iri kubera muri Mestil Hotel, yitabiriwe n’abayobozi bo ku mpande zombi. Itsinda ry’u Rwanda riyobowe na Gisa Teta, ushinzwe ubufatanye na Afurika, mu gihe irya Uganda riyobowe na Richard Kabonero, ushinzwe ubufatanye n’akarere.
Mu biganiro byabereye muri iyi nama, impande zombi zagaragaje ko zizakomeza kongera imbaraga mu bufatanye mu nzego zitandukanye zirimo umutekano, ubucuruzi, ibikorwaremezo, abinjira n’abasohoka, ndetse no guteza imbere ubushobozi bw’abaturage.
Ku ruhande rwa Uganda, Minisiteri y’Ububanyi n’Amahanga yatangaje ko hagezweho amasezerano yo gukemura imbogamizi zikigaragara mu bucuruzi hagati y’ibihugu byombi. Hanagarutswe ku kongera ubufatanye mu nzego z’ingenzi zirimo ubuhinzi, inganda, ubwubatsi n’iterambere ry’ibikorwaremezo.
Itangazo ryashyizwe ahagaragara ryagize riti: “JPC 2026 yahuje Uganda n’u Rwanda yagaragaje neza umubano wa kivandimwe uri hagati y’ibihugu byombi n’ubushake bwa politiki bwo kurushaho kuwuteza imbere.”
Umubano w’u Rwanda na Uganda usanzwe ufite amateka maremare y’ubufatanye, cyane cyane mu nzego z’umutekano n’ubucuruzi. Iyi nama ya JPC ikomeje kugaragaza umuhate w’ibihugu byombi mu gukomeza gusigasira no guteza imbere uwo mubano mu nyungu z’abaturage babyo.
About The Author
