Ihuriro ry’abanyapolitiki batavuga rumwe n’ubutegetsi muri Repubulika Iharanira Demokarasi ya Congo (RDC), rizwi nka C64, ryatangaje ko riteganya gukora imyigaragambyo mu gihugu hose ku wa 8 Nyakanga 2026.
Iyi myigaragambyo igamije kugaragaza kutishimira ubutegetsi bwa Perezida Félix Tshisekedi, aho iri huriro rimushinja kutubahiriza Itegeko Nshinga no gufata ibyemezo bishobora kugira ingaruka ku miyoborere y’igihugu.
Abateguye iyi myigaragambyo bavuga ko abazitabira ibikorwa byo kwamagana ubutegetsi i Kinshasa bazerekeza ku biro by’Umukuru w’Igihugu, basaba ko Perezida Tshisekedi ava ku butegetsi.
Iki cyemezo gikurikiye imyigaragambyo yabaye ku wa 12 Kamena 2026, yari igamije kwamagana gahunda yo gutegura referandumu ishobora kuvugurura Itegeko Nshinga. Abatavuga rumwe n’ubutegetsi bavuga ko ayo mavugurura ashobora gufungurira Perezida Tshisekedi inzira yo kongera kwiyamamaza nyuma ya manda yemerewe n’itegeko.
Muri iyo myigaragambyo yo muri Kamena, abantu batandukanye bakomerekeye mu bushyamirane bwabaye hagati y’abigaragambyaga n’inzego z’umutekano, barimo n’umunyapolitiki utavuga rumwe n’ubutegetsi Martin Fayulu.
Ihuriro C64 ryatangaje ko rizakomeza ibikorwa byo gusaba impinduka mu miyoborere y’igihugu no kurwanya ibyo rivuga ko ari ukurenga ku mahame ya demokarasi n’Itegeko Nshinga.
About The Author
