Leta Zunze Ubumwe za Amerika zatangaje ko zafatiye ibihano bamwe mu bayobozi bakuru b’Ingabo z’u Rwanda (RDF), zibashinja kugira uruhare mu gufasha umutwe w’inyeshyamba wa M23 ukorera mu burasirazuba bwa Repubulika Iharanira Demokarasi ya Congo (RDC).
Ibi bihano byatangajwe nyuma y’iminsi mike habaye inama yiswe iy’Amahoro n’Iterambere yabereye i Washington (Washington Accords for peace and Prosperity) muri Leta zunze ubumwe za America, yitabiriwe na Perezida wa RDC, Félix Tshisekedi, na Perezida w’u Rwanda, Paul Kagame, iyobowe na Perezida wa Amerika, Donald Trump.
Nk’uko byasobanuwe n’ubuyobozi bwa Amerika, RDF n’abandi bayobozi bafatiwe ibihano bakekwaho gufasha M23 mu bikorwa byayo bya gisirikare mu burasirazuba bwa RDC.
Amerika ivuga ko abarwanyi ba M23 bashyigikiwe n’u Rwanda bafashe umujyi wa Uvira muri RDC, binyuranyije n’Amasezerano ya Washington. M23, umutwe wamaze gufatirwa ibihano na Amerika n’Umuryango w’Abibumbye (Loni), ushinjwa ibyaha bikomeye by’ihohoterwa ry’uburenganzira bwa muntu, birimo kwica abaturage bataburanishijwe no gukorera ihohoterwa abasivili, harimo abagore n’abana.
nubwo Leta zunze ubumwe za America zivuga ibyo gusa umutwe wa M23 wo muminsi ishize wari watangaje ko wavuye mumugi wa Uvira murwego rwo kubahiriza agahenge (ceasefire) kari kemejwe mumasezerano yasinyiwe Washington
Leta Zunze Ubumwe za Amerika zashimangiye ko zishyigikiye amahoro n’umutekano mu burasirazuba bwa RDC no mu karere muri rusange. Zavuze ko Amasezerano ya Washington ari intambwe ikomeye mu guhindura amateka y’akarere k’Ibiyaga Bigari, agamije guteza imbere amahoro, ubufatanye n’iterambere hagati y’ibihugu bituranye.
Ku rundi ruhande, u Rwanda rwagiye ruhakana kenshi ibirego byo gufasha M23, rukavuga ko ikibazo cy’umutekano muke mu burasirazuba bwa RDC gifitanye isano n’umutwe wa FDLR, ugizwe n’abagize uruhare muri Jenoside yakorewe Abatutsi mu 1994, ugikorera muri icyo gihugu.
Abo basirikare ba RDF bafatiwe ibihano ni Vincent Nyakarundi Umugaba Mukuru w’Ingabo zirwanira ku butaka (Army Chief of Staff) muri RDF, Ruki Karusisi – Jenerali Majoro, wayoboye Diviziyo ya 5 y’Ingabo za RDF, Mubarakh Muganga – Umugaba Mukuru w’Ingabo z’u Rwanda (Chief of Defence Staff), na Stanislas Gashugi – Umuyobozi w’Ingabo zidasanzwe (Special Operations Force Commander)
Abasesenguzi bavuga ko ibi bihano bishobora kugira ingaruka ku mubano w’u Rwanda na Amerika, ndetse no ku mbaraga zashyirwaga mu gushaka amahoro arambye mu karere k’Ibiyaga Bigari.
About The Author
