Abasirikare b’u Rwanda bari mu butumwa bw’amahoro muri Sudani y’Epfo bari muri batayo ya mbere y’Ingabo z’u Rwanda (Rwanbatt-1), bakorera mu butumwa bw’Umuryango w’Abibumbye buzwi nka United Nations Mission in South Sudan (UNMISS), bahawe imidari y’Umuryango w’Abibumbye mu rwego rwo kubashimira uruhare rwabo mu kubungabunga amahoro kuri uyu wa Kabiri, tariki 3 Werurwe 2026.
Uyu muhango wabereye kuri UN Tomping Compound mu murwa mukuru wa Sudani y’Epfo, Juba.
Umuhango wayobowe na Major General Robert Yaw Affram, Umuyobozi wungirije w’ingabo za UNMISS, washimangiye ko uwo mudari ari ikimenyetso cy’ubwitange, ubunyamwuga no kudacogora mu kazi.
Yagize ati: “Umudari w’Umuryango w’Abibumbye mwahawe uyu munsi ni ikimenyetso cy’ubunyamwuga, imyitwarire myiza, kwitanga no gukorera amahoro mudatezuka. Uhagarariye iminsi myinshi mwakoze mu bihe bikomeye, amajoro mutasinziriye muri mu bikorwa, n’ubutwari bwo guhagarara mushikamye mu bihe by’amage.”
Yanashimiye Guverinoma y’u Rwanda n’Ingabo z’u Rwanda (RDF) ku bwo gukomeza kohereza abasirikare bafite imyitwarire myiza, ubushobozi n’ubunyamwuga muri UNMISS.
Umuyobozi wa Rwanbatt-1, Lt Col Paul Ndushabandi, na we yashimiye abasirikare ayoboye ku bwitange, kwihangana, ubutwari n’umurava bagaragaje mu mezi icumi bamaze mu butumwa. Yabashishikarije gukomeza uwo murava mu gihe gisigaye cy’ubutumwa, avuga ko uwo muhango wo kubambika imidari ari indi ntambwe ikomeye mu murimo wo gukorera inyokomuntu.
Uyu muhango waranzwe n’akarasisi ka gisirikare kagaragaje disipuline, ndetse n’itsinda ndangamuco rya Rwanbatt-1 ryerekanye umuco nyarwanda mu buryo bushimishije.
About The Author
