Ikipe ya Aston Villa ikina muri Shampiyona y’Icyiciro cya Mbere mu Bwongereza Premier League yasinyanye amasezerano mashya y’ubufatanye na Visit Rwanda, iba umuterankunga wayo wemewe ndetse ikaba izajya itanga ikawa muri stade ya Aston Villa.
Ikirango cya Visit Rwanda kizajya kigaragara imbere ku myambaro y’amakipe y’abagabo, abagore ndetse n’ay’abato ya Aston Villa muri season ya 2026/2027.
Ikirango cy’Urwego rw’Igihugu rw’Iterambere mu Rwanda RDB kizajya kigaragara imbere ku myambaro y’amakipe y’abagabo, abagore ndetse n’ay’abato ya Aston Villa, ndetse no mu bindi bice byinshi by’ingenzi by’iyi kipe. Aya masezerano ni yo masezerano y’ubuterankunga akomeye kurusha ayandi Aston Villa yigeze kugirana n’umufatanyabikorwa mu mateka yayo.
Uretse guteza imbere ubukerarugendo, u Rwanda rumaze kwamamara nk’igihugu gikurura ubucuruzi, ishoramari, kwakira ibikorwa bikomeye mpuzamahanga ndetse na siporo. Aston Villa na Visit Rwanda bazakorana kandi mu mishinga itandukanye igamije guteza imbere umupira w’amaguru, guhugura abatoza, gushyigikira ibikorwa by’urukundo, guteza imbere ubuyobozi, no gutanga amahirwe yo kongera ubumenyi n’ubunyamwuga.
Francesco Calvo, Perezida ushinzwe ibikorwa by’ubucuruzi muri Aston Villa, yagize ati: “Ubu bufatanye buradushimishije cyane nk’ikipe ya Aston Villa Football Club kandi bugaragaza uburyo iyi kipe ikomeje kwaguka no kwinjira ku masoko mpuzamahanga. Hari amahirwe menshi yo gukorana, kwigiranaho no guhanga udushya, kandi dutegerezanyije amatsiko gukorana na Visit Rwanda mu gushyira mu bikorwa ibikorwa bifite akamaro mu guteza imbere ubukerarugendo, ishoramari ndetse na siporo.”
Janet Karemera, Umuyobozi Mukuru wa Rwanda Convention Bureau (RCB), yagize ati: “Ubu bufatanye bugaragaza icyerekezo cy’u Rwanda cyo kugera ku bantu benshi ku rwego mpuzamahanga binyuze kuri imwe mu mbuga zikomeye kurusha izindi ku isi, ari wo mupira w’amaguru, no gukomeza kumenyekanisha igihugu cyacu nk’ahantu heza ho gusura, gushoramo imari no gukoreramo ubucuruzi. Guhuza Igihugu cy’Imisozi Igihumbi n’Umujyi w’Ubucuruzi Igihumbi Birmingham ni ikimenyetso cy’indangagaciro dusangiye zirimo kwihangira imirimo, guhanga udushya no kugira intego z’iterambere.”
Yakomeje agira ati: “Dushingiye ku myaka umunani tumaze twamamaza u Rwanda no kurushishikariza Abongereza kurusura, igihugu cy’u Bwongereza kikaba ari isoko rikomeye ry’ubukerarugendo bw’u Rwanda, twishimiye gukorana na Aston Villa kugira ngo tugere ku bandi bantu benshi mu Bwongereza, mu Burayi no hirya no hino ku isi. Binyuze muri ubu bufatanye, turashaka kurushaho kwegera abatekereza gusura u Rwanda, haba ku mpamvu z’ubukerarugendo, ishoramari cyangwa ibikorwa by’ubucuruzi, ari na ko dutanga umusanzu mu iterambere rirambye ry’umupira w’amaguru mu Rwanda.”
Abafana bamaze kugura umwambaro wa Aston Villa wa shampiyona ya 2026/27, haba mu maduka y’iyi kipe cyangwa kuri internet, kandi bifuza ko wongerwaho ikirango cya Visit Rwanda imbere ku gituza, bashobora kujyana uwo mwambaro ku maduka ya Aston Villa ari kuri Villa Park cyangwa Bullring, maze bagashyirirwaho icyo kirango ku buntu.
About The Author
