Ikipe y’igihugu ya Algeria, yari itarigeze irenga 1/4 cy’irangiza, yanditse amateka mashya nyuma yo gutsinda mukeba wayo Maroc.
Mu gice cya mbere, amakipe yombi ntiyabonye uburyo bwinshi bwo gutsinda. Ku munota wa gatatu, Algeria hafi yo gutsindwa igitego kidasanzwe nyuma y’uko Lana Smits akoze ikosa mu mutwe, ariko umunyezamu Chloe N’Gazi akatabara.
Algeria yagerageje gushaka Ikram Adjabi binyuze mu mipira miremire, ariko umunyezamu Khadija Errmichi akomeza kwitwara neza. Roselene Khezami na we yatabaye ikipe ye ku mupira wari utewe muri koruneri.
Maroc yaje kubona uburyo bukomeye bwo gufungura amazamu, ariko ishoti rya Ibtissam Jraidi rikubita igiti cy’izamu.
Nyuma y’aho, Sakina Ouzraoui yakomeje guteza ibibazo ubwugarizi bwa Algeria, ariko ba myugariro bakomeza kwitwara neza.
Ku munota wa 40, Kautar Azraf w’imyaka 18 yafunguye amazamu ku ruhande rwa Maroc nyuma yo guhabwa umupira mwiza na Hanane Ait El Haj. Yinjiranye umupira mu rubuga rw’amahina, aca kuri myugariro Ines Belloumou, atsinda igitego cyiza.
Uyu mukinnyi ukinira ikipe y’abato ya Barcelona yagaragaje amarangamutima menshi nyuma yo gutsinda, ndetse yari hafi kurira kubera ibyishimo.
Mu gice cya kabiri, Maroc yatekereje ko yatsinze igitego cya kabiri, ariko nyuma yo gusuzuma amashusho hifashishijwe VAR, umusifuzi yacyanze.
Umukino wakomeje urangwa n’amakosa menshi, ndetse Kautar Azraf ahabwa ikarita y’umuhondo.
Algeria yabonye ishoti rya mbere rijya mu izamu ku munota wa 74, ubwo Lina Boussaha yageragezaga amahirwe ye, ariko umunyezamu Errmichi ararifata.
Ku munota wa 83, Algeria yaje kubona igitego cyo kwishyura. Lina Boussaha yatsinze nyuma yo guhabwa umupira mwiza na Sofia Bekhaled, atsinda igitego cyatumye amakipe yombi anganya 1-1.
Mu minota y’inyongera, Maroc yasabye penaliti nyuma y’uko Sakina Ouzraoui aguye mu rubuga rw’amahina. VAR yahamagaye umusifuzi, maze penaliti iratangwa.
Ariko, nk’uko byagenze mu mukino wa Cameroun, Maroc yahinduye umukinnyi wagombaga gutera penaliti ku munota wa nyuma. Benzina ni we wayiteye, ariko ayikubita ku giti cy’izamu.
Bityo, amakipe yombi yahise ajya muri penaliti.
Muri penaliti:
- Marine Dafeur yatsindiye Algeria penaliti ya mbere.
- Zineb Redouani wa Maroc yarayihushije.
- Amira Ould-Braham wa Algeria na we yarayihushije.
- Elodie Nakkach wa Maroc aratsinda.
- Sofia Bekhaled ashyira Algeria imbere.
- Rania Boutiebi wa Maroc yishyura.
- Roselene Khezami wa Algeria ahusha penaliti.
- Sakina Ouzraoui wa Maroc na we arayihusha.
- Ines Belloumou atsindira Algeria penaliti y’ingenzi.
- Ibtissam Jraidi wa Maroc akubita penaliti ku mutambiko w’izamu.
Ibyo byatumye Algeria yegukana umwanya wa gatatu mu gikombe cya Afurika cy’abagore cya 2026 ku nshuro ya mbere mu mateka yayo.
About The Author
