Ishyirahamwe ry’Umupira w’Amaguru muri Sénégal FSF ryatangaje ku wa Kabiri, tariki ya 18 Kanama 2026, ko Patrick Vieira yagizwe umutoza mushya w’ikipe nkuru y’igihugu ya Sénégal, ahita atangira inshingano ze. Uyu wahoze ari umukinnyi w’ikipe y’igihugu y’u Bufaransa ndetse n’ikipe ya Arsenal yasinyanye amasezerano y’imyaka ine yo gutoza Intare za Teranga.
Vieira, ufite imyaka 50, yavukiye i Dakar, umurwa mukuru wa Sénégal. Yasimbuye Pape Thiaw, wirukanywe hamwe n’abari bagize itsinda rye rya tekinike nyuma y’uko Sénégal isezerewe mu Gikombe cy’Isi cya 2026.
Sénégal yari yabaye iya gatatu mu itsinda ryayo mbere yo gutsindwa n’u Bubiligi ibitego 3-2 nyuma y’inyongera mu mukino wa 1/16. Iyi kipe yari yabanje kuyobora umukino n’ibitego 2-0 mbere y’uko iminota isanzwe irangira.
Mu itangazo ry’Ishyirahamwe ry’Umupira w’amaguru muri Sénégal ryagize riti: “Patrick Vieira ni we mutoza mushya w’ikipe nkuru y’igihugu ya Sénégal. Itariki azerekanirwaho ku mugaragaro n’ibindi bijyanye no gutangira inshingano ze bizatangazwa mu minsi iri imbere.”
Komite yihutirwa y’iri shyirahamwe yemeje ishyirwaho rye ku bwumvikane busesuye nyuma y’inama idasanzwe yabaye hifashishijwe ikoranabuhanga ku wa Mbere.
FSF yavuze ko iki cyemezo cyafashwe mu rwego rwo kubaka ubuyobozi bwa tekinike bufite ireme kandi bujyanye n’intego z’iterambere ry’umupira w’amaguru muri Sénégal.
Ni ubwa mbere Patrick Vieira agiye gutoza ikipe y’igihugu. Mu gihe yari akiri umukinnyi, yegukanye Igikombe cy’Isi hamwe n’u Bufaransa mu 1998, anagira ibihe byiza cyane muri Arsenal, aho yakinnye imikino irenga 400. Yakiniye kandi amakipe akomeye arimo Inter Milan, Juventus na Manchester City.
Mu mwuga wo gutoza, Vieira yanyuze mu makipe arimo New York City FC, Nice, Crystal Palace, Strasbourg ndetse na Genoa yo mu Butaliyani, yavuyemo mu Ugushyingo 2025 nyuma yo kutabona intsinzi mu mikino ya mbere y’icyo gihembwe.
Abafana benshi bakiriye neza ishyirwaho rye, bashimangira inkomoko ye yo muri Sénégal ndetse n’uburambe afite mu mupira w’amaguru wo ku mugabane w’u Burayi no muri Amerika.
Hari bamwe mu bafana bagaragaje icyizere gicagase, bibaza niba azashobora gukoresha neza impano ziri muri iyi kipe no kongera kuyigarurira intsinzi nyuma yo kutitwara neza mu Gikombe cy’Isi.
Biteganyijwe ko imikino ye ya mbere nk’umutoza wa Sénégal izaba muri Nzeri 2026, mu gihe iyi kipe izaba itangiye imyiteguro y’Igikombe cya Afurika cya 2027 ndetse n’andi marushanwa ari imbere.
Ishyirwaho rya Vieira rirerekana intangiriro nshya kuri imwe mu makipe akomeye muri Afurika. Hamwe n’umutoza ufite inkomoko muri Sénégal ndetse n’uburambe ku rwego mpuzamahanga, Intare za Teranga zifuza kongera kubaka ikipe ishoboye guhatana ku rwego rwa Afurika no ku rwego rw’isi.
About The Author
