Ibiciro bya peteroli ku masoko mpuzamahanga byagabanutse ku kigero kiri hafi ya 6%, nyuma y’uko hagaragaye ibimenyetso byerekana ko ibiganiro hagati ya Leta Zunze Ubumwe za Amerika na Iran bishobora kuganisha ku masezerano yo kugabanya amakimbirane amaze igihe hagati y’impande zombi.
Amakuru y’ubucuruzi agaragaza ko igiciro cya peteroli yo mu bwoko bwa Brent cyamanutseho hafi 5,7%, kigera ku madolari 97,69 kuri buri kagunguru. Naho peteroli yo muri Leta Zunze Ubumwe za Amerika izwi nka West Texas Intermediate (WTI), yagabanutseho 6%, igera ku madolari 90,85 ku kagunguru.
Iri gabanuka ry’ibiciro ni ryo rinini ribayeho muri uku kwezi, ndetse ni bwo bwa mbere ibiciro bigera kuri uru rwego kuva mu ntangiriro za Gicurasi 2026.
Abasesenguzi bemeza ko iri hinduka ryatewe ahanini n’icyizere cy’abashoramari ko ibiganiro biri guhuza Washington na Tehran bishobora gutanga umusaruro. Perezida wa Amerika, Donald Trump, aherutse gutangaza ko hari intambwe ikomeye imaze guterwa mu biganiro hagati y’impande zombi, nubwo hakiri ibibazo bimwe bitarakemurwa.
Mu ngingo zikomeje kuganirwaho harimo imikoreshereze n’imicungire y’umuhora wa Hormuz, unyuramo igice kinini cya peteroli yoherezwa ku isoko mpuzamahanga. Iran ivuga ko yifuza gukomeza kugira uruhare rukomeye mu micungire y’uyu muhora, mu gihe Amerika ishaka ko ibikorwa by’ubwikorezi bihanyura bikomeza nta mbogamizi.
Hari kandi ibiganiro ku bihano by’ubukungu byafatiwe Iran, aho Tehran isaba ko hafungurwa imitungo yayo n’amafaranga byafatiwe mu bigo by’imari mpuzamahanga. Ku ruhande rwa Amerika, kimwe mu byo ishyize imbere ni uguhagarika ibikorwa byose bifitanye isano n’ikorwa ry’intwaro za nucléaire.
Nubwo amasezerano atarashyirwaho umukono, impande zombi zigaragaza ko ibiganiro bigeze kure. Ibi byatumye impungenge zari zifitwe ku ihungabana ry’itangwa rya peteroli ku rwego rw’isi zigabanuka, bituma n’ibiciro ku masoko mpuzamahanga bitangira kumanuka.
Kuri ubu, ibikorwa bya gisirikare hagati y’impande zombi bisa n’aho byagabanyutse, ibintu bikomeje kongera icyizere cy’uko hashobora kuboneka umuti urambye ku makimbirane amaze igihe hagati ya Amerika na Iran.
About The Author
