Mu Karere ka Burera hafatiwe abanyeshuri icyenda bakekwaho kugira uruhare mu bikorwa byo gukubita abarimu mu bihe bitandukanye, ibintu byatumye inzego z’umutekano zitangira iperereza kuri ibyo byaha.
Mu Rwunge rw’Amashuri rwa Runaba, ruherereye mu Murenge wa Butaro, abanyeshuri barindwi bari hagati y’imyaka 15 na 18 batawe muri yombi nyuma yo gukekwaho gukubita abarimu batatu. Abo barimu ni Nshimiyimana Michel, Nkundineza Jean Marie Vianney na Bucyayungura Jean Baptiste.
Polisi y’u Rwanda mu Ntara y’Amajyaruguru yemeje ko abo banyeshuri bafashwe kugira ngo hakorwe iperereza no gukurikiranwa hakurikijwe amategeko.
Nyuma y’iki gikorwa, ubuyobozi bw’Umurenge wa Butaro bufatanyije na Polisi bwaganiriye n’abanyeshuri ba GS Runaba, bubakangurira kubaha abarimu, kubahiriza amategeko agenga amashuri no kurangwa n’imyitwarire myiza. Abanyeshuri bitabiriye ibyo biganiro bemeye ko habaye amakosa kandi bagaragaza ubushake bwo guhindura imyitwarire.
Abo banyeshuri barindwi bafungiye kuri Sitasiyo ya Polisi ya Butaro, mu gihe iperereza rikomeje.
Mu kindi gikorwa cyabereye mu Murenge wa Kivuye, na bwo mu Karere ka Burera, abandi banyeshuri babiri bo mu Rwunge rw’Amashuri rwa Butandi na bo bafashwe bakekwaho gukomeretsa umwarimu.
Amakuru ava muri iryo shuri agaragaza ko ikibazo cyatangiye ubwo bamwe mu banyeshuri bashakaga kubangamira bagenzi babo bari bagiye gufata amafunguro. Umwarimu wari ushinzwe gukurikirana icyo gikorwa yagerageje kubabuza, ariko aza gukubitwa inkoni mu mutwe n’abamwe muri bo, arakomereka.
Uyu mwarimu yahise ajyanwa ku Kigo Nderabuzima cya Gashanje kugira ngo yitabweho n’abaganga, mu gihe abanyeshuri babiri bakekwaho uruhare muri icyo gikorwa bashyikirijwe inzego zibishinzwe ngo bakurikiranwe.
Ibi bikorwa byombi byabereye mu Karere ka Burera byatumye inzego z’uburezi n’iz’umutekano zongera kwibutsa abanyeshuri akamaro ko kubaha abarimu no gukemura amakimbirane mu buryo bwubahiriza amategeko.
About The Author
