Urukiko rwo muri Iran rwanze ubujurire bwa Parastoo Ahmadi ku gihano cy’inkoni 74 n’icyo kumara imyaka ibiri atemerewe gukora ibikorwa by’ubuhanzi, nk’uko ibitangazamakuru byo muri Iran byabitangaje mu cyumweru gishize.
Ibi byatangajwe nyuma y’iminsi mike gusa hatangajwe ko ubutegetsi bwa Iran bushaka gufatira ibihano abandi bahanzi kubera imyitwarire ijyanye n’ibikorwa byabo byo guhanga.
Urukiko rwemeje igihano cyatanzwe n’Urukiko Mpanabyaha rw’Intara ya Qom, cyari cyarahawe Ahmadi, abahanzi Ehsan Beiraqdar na Soheil Faqih Nasiri, ndetse n’abandi bantu batandatu bari bagize itsinda ry’abakoraga kuri iyo video.
Urukiko rwavuze ko kuba Ahmadi yarakoze igitaramo atambaye hijab byarenze ku “myitwarire ikwiye mu ruhame”, binyuze mu gukora no gukwirakwiza ibintu byafatwaga nk’ibiteye isoni cyangwa bitubahiriza amahame y’imyitwarire ku mbuga za interineti.Ahmadi yatawe muri yombi nyuma y’uko igitaramo cye cyashyizwe kuri YouTube mu Kuboza umwaka ushize.
Ingingo ya 638 y’Itegeko Mpana-byaha rya Iran ihanisha umuntu gukora igikorwa gifatwa nk’“icyaha ku mahame y’idini mu ruhame” cyangwa ibikorwa bifatwa nk’ibibangamira imyitwarire y’abaturage, harimo no kugaragara mu ruhame adafite hijab.
Naho Ingingo ya 743 ihanisha gukwirakwiza cyangwa gushishikariza ibikorwa bifatwa nk’ibyangiza umuco, ubusambanyi cyangwa ibindi bikorwa bifatwa nk’ibibangamira amahame y’imyitwarire y’abaturage, cyane cyane iyo bikoreshejwe imbuga za internet n’ikoranabuhanga ry’itumanaho.
About The Author
