Umukino w’ikirarane cy’Umunsi wa 15 wa Shampiyona y’u Rwanda wagombaga guhuza APR FC na Al Hilal SC wahinduriwe ikibuga n’isaha ugomba kuberaho, bitewe n’ikibazo cy’amashanyarazi kimaze iminsi kigaragara kuri Stade Amahoro.
Mu rukerera rwo kuri uyu wa Mbere, tariki ya 9 Gashyantare 2026, Urwego rutegura Shampiyona y’Icyiciro cya Mbere mu Rwanda (Rwanda Premier League) rwatangaje ko uyu mukino utazongera kubera kuri Stade Amahoro nk’uko byari biteganyijwe.
Itangazo ryashyizwe hanze rivuga ko umukino uzabera kuri Kigali Pelé Stadium, ukazatangira saa Cyenda z’amanywa. Ubusanzwe wari uteganyijwe saa Kumi n’Ebyiri z’umugoroba.
Impinduka y’isaha yatewe n’uko Kigali Pelé Stadium ifite ibibazo by’amashanyarazi mu matara amurika ikibuga nijoro, bigatuma idashobora kwakira imikino yo mu masaha ya nimugoroba kugeza ikibazo gikemutse.
Amakuru aturuka mu batunganya iyi mikino agaragaza ko no kutabera kuri Stade Amahoro byakozwe hagendewe ku cyifuzo cya Al Hilal SC, izakira APR FC, mu gihe mu minsi mike iri imbere ifite undi mukino mpuzamahanga uzabera kuri iki kibuga.
Al Hilal SC itegerejwe kwakira FC Saint-Éloi Lupopo yo muri Repubulika Iharanira Demokarasi ya Congo mu mukino w’Umunsi wa Gatandatu wa CAF Champions League, uteganyijwe ku wa 14 Gashyantare 2026.
Ibibazo by’umuriro kuri Kigali Pelé Stadium byaherukaga kugaragara mu mikino iheruka ya shampiyona. Mu mukino wahuje Police FC na AS Kigali, amatara yigeze kuzima inshuro ebyiri, umukino uhagarara iminota igera kuri 30.
Ni nako byagenze kandi mu mukino APR FC yatsinzemo Bugesera FC ibitego 2-1, aho habayeho ibura ry’umuriro ryatumye umukino uhagarara iminota igera kuri 15 mbere yo gusubukurwa.
Ikindi kibazo cyabaye mu mukino Al Hilal SC yatsinzemo Amagaju FC ibitego 8-0, aho moteri z’amashanyarazi zigeze guhagarara ku munota wa 12 no ku wa 84, zongera gukora nyuma y’igihe gito.
Kugeza ubu APR FC ni yo iyoboye urutonde rwa shampiyona n’amanota 37, ikurikiwe na Al Hilal SC ifite amanota 35, na Police FC ifite amanota 34 ibintu bituma umukino uzabahuza utegerejwe cyane n’abakunzi b’umupira w’amaguru.
About The Author
