Ku wa 3 Gicurasi 2026, inkuba yakubise abantu babiri bo mu Karere ka Burera, ibahitana mu mirenge ya Rwerere na Cyeru.
Umwe wari ufite imyaka 39, utuye mu Murenge wa Rwerere, yakubiswe n’inkuba ari mu nzu hamwe n’umuryango we, asiga umugore n’abana bane. Undi wari ufite imyaka 56 wo mu Murenge wa Cyeru, inkuba yamukubise avuye gushaka ubwatsi bw’inka.
Ubuyobozi bw’Akarere ka Burera bwihanganishije imiryango yabuze ababo, bunashimangira ko bukomeje ubukangurambaga bwo kwirinda inkuba n’ibindi biza.
Si i Burera gusa habaye ibi byago, kuko uwo munsi inkuba yanahitanye abandi bantu batanu mu turere twa Rubavu na Rutsiro.
Hagati aho, mu Karere ka Kirehe, abaturage bifatanyije n’ubuyobozi bw’akarere mu gufasha umworozi wapfushije amatungo 33 arimo inka n’intama, byishwe n’inkuba. Yashumbushijwe amatungo arimo inka 25, intama n’ihene, mu gikorwa cyashimwe nk’ubufatanye bwiza.
Ubuyobozi bwibukije abaturage gukurikiza amabwiriza yo kwirinda inkuba, nko kutagama munsi y’ibiti, kwirinda kugenda mu mvura nyinshi no kurinda amatungo.
Muri rusange, imibare igaragaza ko ibiza bikomeje kwibasira u Rwanda, aho mu gihe kirenga umwaka umwe byahitanye abarenga 200, binangiza ibikorwa remezo n’imitungo y’abaturage.
About The Author
