Amakimbirane ya gisirikare hagati ya Iran na Amerika akomeje gufata indi ntera, nyuma y’amakuru agaragaza ko ibitero Iran imaze igihe igaba byangije ibikorwa remezo n’ibikoresho bya gisirikare bya Amerika biri mu bihugu bitandukanye byo mu Burasirazuba bwo Hagati.
Raporo zitandukanye zigaragaza ko ibigo byinshi bya gisirikare bya Amerika byahuye n’ibyangiritse biturutse ku bitero bya misile na drones, ibintu byateje impungenge ku mutekano w’inyungu za Amerika muri ako karere.
Mu bihugu byavuzweho kwibasirwa harimo Saudi Arabia, UAE, Qatar, Kuwait, Iraq, Jordan, Bahrain na Oman, aho ibikorwa bya gisirikare bya Amerika bikorera. Bimwe mu bikoresho byangiritse birimo ibikoresho by’ubwirinzi bwo mu kirere, ibikorwa by’itumanaho rya gisirikare ndetse n’ibikoresho byifashishwa mu butasi.
Abakurikirana ibya gisirikare bavuga ko Iran isa n’iyahinduye uburyo ikoramo ibitero, ikava ku mugambi wo kugaba ibitero byinshi icyarimwe ikerekeza ku kwibasira ahantu h’ingenzi hagamijwe gutera igihombo kinini ku ruhande bahanganye.
Ni mu gihe Amerika ikomeje gutangaza ko ibikorwa byayo bya gisirikare byagabanyije ubushobozi bwa Iran bwo kugaba ibitero, nubwo ibikorwa biherutse kugaragaza ko Tehran igifite ubushobozi bwo kugera ku ntego zayo mu bice bitandukanye byo mu karere.
Muri iyi minsi kandi, amakimbirane yarushijeho gukaza umurego nyuma y’uko Amerika itangaje ko yagabye ibitero ku bikorwa bya gisirikare bya Iran biri hafi y’agace ka Strait of Hormuz, kamenyerewe nk’inzira ikomeye inyuramo ubucuruzi mpuzamahanga bw’ibikomoka kuri peteroli.
Nyuma y’ibi bikorwa, Iran yatangaje ko nayo yagabye ibitero byo kwihimura ku nyungu za Amerika muri aka karere, mu gihe ibihugu bimwe byatangiye kongera ingamba z’umutekano kubera impungenge z’uko imirwano ishobora gukomeza kwaguka.
Nubwo hakomeje kuganirirwa uburyo bwo kugera ku masezerano yo guhagarika imirwano, ibikorwa bya gisirikare bikomeje kugaragara ku mpande zombi bituma hari impungenge ko amahoro ashobora kutagerwaho vuba.
Abasesenguzi mu bya politiki n’umutekano bavuga ko niba ubwumvikane butabonetse, ibikorwa bya gisirikare by’ibihugu byombi bishobora gukomeza kugira ingaruka ku mutekano n’ubukungu bw’akarere kose k’u Burasirazuba bwo Hagati.
About The Author
