Kuri uyu wa gatatu, urwego rw’ubugenzacyaha mu Rwanda (RIB) rwatanze ikiganiro cyihariye ku banyeshuri ba Kaminuza y’u Rwanda Ishami rya Huye, kigamije kubakangurira gusobanukirwa isi nshya batuyemo ya “Internet” n’ibyaha biyikorerwamo.
Mu kiganiro Ygiranye n’abanyeshuri ndetse n’abayobozi muri Kaminuza y’u Rwanda ishami rya Huye, Dr. Murangira B. Thierry yagaragaje ko abakoresha ikoranabuhanga bose bamaze guhinduka abaturage b’isi ya murandasi, bazwi nka “Netizens”
Dr. Murangira yatanze gasopo ikomeye ku bantu bakoresha imbunga nkoranyambaga batitaye ku byo bashyiraho.
Yagize ati: “Kuri internet, iyo ushyize amashusho cyangwa amafoto yawe agize icyasha, biba bimeze nko kugenda wambaye ubusa mu muhanda.”
Yibukije abanyeshuri ko internet itibagirwa, bityo buri kintu cyose umuntu ashyizeho kigena isura ye mu muryango.
Muri iki kiganiro kandi, yagaragaje amatsinda atandukanye y’ibyaha byibasiye u Rwanda muri iki gihe:
- Cyber Crime: Kwinjira mu makuru y’undi muntu utabiherewe uburenganzira.
- Telephone-Enabled Crimes: Ubujura bukorwa hifashishijwe amayeri n’uburiganya kuri terefoni.
- Cyber Stalking: Kugenda runono umuntu kuri murandasi umwibasira cyangwa umubuza amahoro.
- Kwiyitirira abandi: Gukoresha imyirondoro y’abandi bantu mu bwigenge budashira.
- Sextortion & Deepfakes: Dr. Murangira yagaragaje ko gukoresha amafoto y’urukozasoni mu gutera abantu ubwoba (Blackmail) cyangwa gukoresha Ubuhanga bw’ubuhimbano (AI/Deepfakes) mu guhimba amajwi n’amashusho ari ibyaha bihanwa n’amategeko.
Dr. Murangira ntiyariye iminwa ku bijyanye n’ubujura bw’amafaranga bukorerwa kuri internet. Yatanze ingero z’abantu benshi bamaze kwibwa n’amashyirahamwe akora uburiganya azwi nka Pyramid Schemes nka SST, TAT, na Cavallon, aburira abanyeshuri kwitonda mu bijyanye n’ishoramari rya Cryptocurrency ridafite gihamya.
Nubwo hari ibyaha, Dr. Murangira yagaragaje ko Leta y’u Rwanda ishyigikiye ikoreshwa ry’imbunga nkoranyampaga mu guteza imbere ubwisanzure, itumanaho, n’ubucuruzi (Marketing). Cyakora, yashyize itandukaniro hagati y’amakuru:
- Misinformation: Gutanga amakuru atari yo utabigambiriye.
- Disinformation: Gutanga amakuru y’ibinyoma ubishaka (ubigambiriye).
- Propaganda: Amakuru agamije kuyobya abantu cyangwa gukwirakwiza inzangano.
Mu gice cy’ibibazo n’ibisubizo, abanyeshuri babajije ku bijyanye n’ubwisanzure bwo gutanga ibitekerezo (Itegeko rya 38). Dr. Murangira yasobanuye ko uburenganzira bw’umuntu butagomba kubangamira ubw’undi. Yagize ati: “Inshingano zanjye nizo ziha uburenganzira bw’abandi.”
Ku kibazo cy’abantu bavuga ko banenga ubutegetsi bakaba bafatwa, yavuze ko biterwa n’intego (intention) ndetse n’uburyo bikozwemo, cyane iyo byihishije inyuma y’ibinyoma cyangwa propaganda zigamije kwinjira mu buzima bw’abandi.
Dr. Murangira yasabye abanyeshuri gukoresha murandasi nkahantu ho kwigira ubumenyi aho kuba ahantu ho kwishora mu bikorwa by’ubwomanzi cyangwa ubuswa.
Dr. Murangira yasozaga avuga ko Urwego rushinzwe ubugenzacyaha (RIB) rufite ubushobozi bwo gutahura no gukurikirana ibyaha byose bikorerwa kuri murandasi, haba imbere mu gihugu cyangwa hanze yacyo, binyuze mu bufatanye n’izindi nzego (Cyber Investigation).
About The Author
