Kuri uyu wa Kabiri, tariki ya 7 Mata 2026, mu burasirazuba bwa Repubulika Iharanira Demokarasi ya Congo (RDC), haravugwa ibitero bikomeye byibasiye uduce dutuwe n’abaturage mu turere twa Minembwe na Kalehe, mu Ntara ya Kivu y’Amajyepfo.
Umuvugizi w’ihuriro rya AFC/M23, Lawrence Kanyuka, yatangaje ko ingabo zifasha ubutegetsi bwa Kinshasa zagabye ibitero zikoresheje drones z’intambara mu gace ka Mikenke no mu nkengero zako, kuva mu gitondo kare. Avuga ko ibyo bitero byahitanye ubuzima bw’abantu, bisenya inzu z’abaturage ndetse bikica amatungo.
Yakomeje avuga ko hari n’ibindi bitero byagabwe mu duce twa Lumbishi, Katale na Tushunguti muri teritwari ya Kalehe, aho ngo harashwe mu duce dutuwe n’abasivili benshi.
AFC/M23 ishinja izi ngabo kurenga ku mategeko mpuzamahanga arengera abasivili mu bihe by’intambara, ikanahamagara Abanyekongo n’umuryango mpuzamahanga kwamagana ibyo yise ihohoterwa rikorerwa abaturage.
Ku rundi ruhande, kugeza ubu, ubuyobozi bwa Leta ya Congo ntiburagira icyo butangaza kuri ibi birego.
Abasesenguzi bavuga ko amakuru nk’aya akwiye kwitabwaho n’inzego zigenga kugira ngo hamenyekane ukuri ku biri kubera muri utu duce, cyane cyane mu gihe intambara ikomeje gukaza umurego mu burasirazuba bw’icyo gihugu.
Ibikorwa by’imirwano bikomeje guteza impungenge ku mutekano w’abaturage, aho benshi bakomeje guhunga ingo zabo, mu gihe ibikorwaremezo n’ubuzima bwabo bikomeje kwibasirwa n’intambara.
About The Author
