Perezida wa Leta Zunze Ubumwe za Amerika, Donald Trump, yongeye kuburira Iran ko igihugu cye cyiteguye gusubiza mu buryo bukomeye mu gihe cyagerageza kugirira nabi we cyangwa inyungu za Amerika.
Ibi yabitangaje ku wa 11 Nyakanga 2026 abinyujije ku rubuga rwa Truth Social, nyuma y’uko mu muhango wo gushyingura umwe mu bayobozi bakomeye ba Iran humvikanye amagambo yasabaga ko Trump yicwa.
Iri tangazo rije rikurikira amakuru yatangajwe n’ibinyamakuru birimo CNN na The Wall Street Journal, yavugaga ko Israel yahaye Amerika amakuru y’ubutasi agaragaza umugambi uvugwa wo gushaka kugirira nabi Trump.
Amakuru avuga ko inzego z’umutekano za Amerika zisanzwe zikurikirana ibyago bishobora guturuka kuri Iran cyangwa abantu bayishyigikiye, nubwo bamwe mu bayobozi bagaragaza ko amakuru mashya yatanzwe na Israel atari yemezwa n’inzego z’ubutasi za Amerika.
Trump yavuze ko azi ko amaze igihe ari mu bantu Iran ivuga ko ishaka kwihimuraho, ashimangira ko kugeza ubu nta gitero cyigeze kimugeraho ariko ko adafata icyo kibazo nk’icyoroheje.
Umwuka mubi hagati ya Washington na Tehran umaze imyaka myinshi, cyane cyane kuva mu 2020 ubwo ubuyobozi bwa Trump bwategekaga igitero cya drone cyahitanye Jenerali Qassem Soleimani, wari umwe mu bayobozi bakomeye b’Ingabo z’Abazamu b’Impinduramatwara ya Iran (IRGC). Iran yakomeje kuvuga ko izihorera kuri icyo gitero.
Nubwo imvugo ya Trump ikomeje gukomera, yavuze ko ibiganiro hagati ya Amerika na Iran bitarahagarara burundu, ariko agaragaza ko amahirwe yo kugera ku bwumvikane akomeje kugabanuka.
Ku ruhande rwa Iran, abayobozi bakomeje gushimangira ko igihugu cyabo kitazemera igitutu gituruka hanze kandi ko gifite ubushobozi bwo kwirwanaho mu gihe cyagabwaho ibitero.
Mu gihe hakomeje kuvugwa amakuru y’ubutasi n’ibibazo bya dipolomasi, abasesenguzi bavuga ko umubano hagati ya Amerika, Iran na Israel ukomeje kuba umwe mu bibazo bikomeye bishobora kugira ingaruka ku mutekano wo mu Burasirazuba bwo Hagati.
About The Author
