Perezida wa Leta Zunze Ubumwe za Amerika, Donald Trump, yatangaje ko igihugu cye cyatangiye icyiciro gishya cy’ibitero bya gisirikare kuri Iran, avuga ko bigamije kugabanya ubushobozi bw’iki gihugu bwo guhungabanya umutekano mu Burasirazuba bwo Hagati.
Trump yavuze ko ibikorwa bya gisirikare bizakorwa mu buryo bukomeye kandi bishobora gukomeza no mu minsi ikurikiraho. Ubuyobozi bw’Ingabo za Amerika zikorera mu Burasirazuba bwo Hagati (CENTCOM) na bwo bwemeje ko hari ibikorwa byatangiye, busobanura ko byibanda ku ntego zifatwa nk’izibangamiye umutekano w’abasivili n’ubwisanzure bw’ubwikorezi bwo mu nyanja.
Mu zindi ngamba zatangajwe na Washington, harimo kongera igitutu cy’ubukungu kuri Iran no gufata ibyemezo birebana n’ubwikorezi bwo mu Muhora wa Hormuz. Perezida Trump yavuze ko Amerika izakomeza kugira uruhare mu kurinda uwo muhora, anatangaza gahunda yo gusoresha imizigo iwunyuramo.
I Tehran, Minisitiri w’Ububanyi n’Amahanga wa Iran, Abbas Araghchi, yanenze ayo magambo, avuga ko niba kurinda inzira z’ubucuruzi bifatwa nka serivisi yishyurwa, Iran na yo ishobora gutanga iyo serivisi ku giciro gitandukanye n’icyatangajwe na Amerika.
Aya makimbirane yongeye gukaza umurego nyuma y’ihagarikwa ry’agahenge kari kamaze igihe gito. Amerika ivuga ko yagabye ibitero ku bikorwa bya gisirikare bya Iran, mu gihe Tehran na yo itangaza ko yibasiye ibirindiro by’ingabo za Amerika biri mu bihugu birimo Bahrain, Jordan, Kuwait na Oman.
Trump yongeye kandi kuvuga ko ibikorwa bya gisirikare bishobora kwaguka bikagera no ku gace ka Pickaxe Mountain, ahakekwa ibikorwa bifitanye isano na gahunda ya Iran yo gutunganya uranium.
Nubwo ibikorwa bya gisirikare bikomeje, impande zombi zivuga ko ibiganiro bya dipolomasi bitarahagarara. Amerika ivuga ko ishaka igisubizo kirambye, mu gihe Iran itangaza ko ikomeje ibiganiro n’abahuza barimo Qatar, Pakistan na Oman hagamijwe kugabanya umwuka mubi.
Raporo zitandukanye zivuga ko imirwano iheruka imaze guhitana nibura abantu 25 muri Iran. Umuryango w’Abibumbye na wo wagaragaje impungenge z’uko ubushyamirane bushobora kurushaho guhungabanya umutekano wo mu karere, usaba impande zose kwifata no gushyira imbere inzira z’ibiganiro.
About The Author
