Ingabo z’u Rwanda ziri mu butumwa bw’amahoro bw’Umuryango w’Abibumbye muri South Sudan, zifatanyije n’abapolisi b’u Rwanda ndetse n’umuryango ushinzwe ibikorwa by’ubuzima, batangije igikorwa cyo gutanga serivisi z’ubuvuzi ku buntu ku baturage bo mu gace ka Gudele mu murwa mukuru Juba.
Abaturage barenga 200 bamaze guhabwa serivisi zitandukanye zirimo kwisuzumisha indwara rusange, ubuvuzi bw’amenyo, kwita ku bagore batwite hifashishijwe ultrasound, ndetse n’ubuvuzi bw’amaso.
Abashinzwe iki gikorwa bavuga ko kigamije gufasha abaturage kubona ubuvuzi bw’ibanze no gukomeza guteza imbere imibereho myiza y’abaturage bo mu bice bakoreramo ubutumwa bw’amahoro.
Umuganga mukuru mu ngabo z’u Rwanda ziri muri ubu butumwa yatangaje ko ibikorwa nk’ibi biri mu nshingano zo gufasha no kurinda abasivili, asobanura ko abaturage bazakomeza guhabwa ubujyanama, imiti ndetse n’ubuvuzi ku ndwara zitandukanye zirimo malariya n’izindi zikunze kwibasira abaturage.
Abayobozi bo mu rwego rw’ubuzima muri Sudani y’Epfo bashimye uruhare rw’ingabo n’abapolisi b’u Rwanda muri iki gikorwa, bavuga ko serivisi zitangwa ku buntu zifasha abaturage benshi kubona ubuvuzi batari kubona mu buryo bworoshye.
Banasabye ko ubufatanye hagati y’u Rwanda, inzego za Leta ya Sudani y’Epfo n’Umuryango w’Abibumbye bwakomeza kugira ngo abaturage benshi barusheho kugerwaho na serivisi z’ubuzima no guteza imbere imibereho yabo.
About The Author
