Rayon Sports iri kwitegura umwaka wimikino wa 2026-2027 yakinnye umukino nabato bayo batarengeje imyaka 20 nuko babatsinda ibitego 7-1 mu mukino wa gicuti wari ugamije gukomeza imyiteguro ya Rayon Day 2026. Ikipe nkuru yagaragaje umukino urimo umuvuduko, ubufatanye buhebuje ndetse no gukoresha neza amahirwe yo gutsinda.
Uyu mukino wabaye uburyo bwiza bwo kongera icyizere no gukomeza kubaka ubukana bw’ikipe. Kuva ku munota wa mbere, Rayon Sports yafashe umukino mu maboko, ikina umupira uca hasi, yiharira umupira kandi ishyira igitutu gikomeye ku ikipe ya U-20, bituma igaragaza intege nke mu bwugarizi.
Muhoza Daniel ni we wabaye umukinnyi mwiza w’umukino nyuma yo gutsinda ibitego bitatu (hat-trick). Yagaragaje ubuhanga mu kwihagararaho imbere y’izamu, kwimenyereza umwanya no kurangiza neza amahirwe yabonye, ibintu byagaragaje uburyo agenda aba ingenzi mu ikipe.
Ndayishimiye Didier na we yitwaye neza atsinda ibitego bibiri, akomeza gushyira igitutu ku bwugarizi bwa U-20. Ubufatanye hagati ye na Muhoza Daniel bwagaragaje ko abasatira ba Rayon Sports bamaze kumenyerana neza, ibintu abatoza bamaze igihe bakoraho.
Ibindi bitego byatsinzwe na Nizeyimana Moubarak ndetse na Uwimana Ami, buri umwe atsinda igitego kimwe, basoza umukino Rayon Sports yigaragajemo nk’ikipe ihamye haba mu bwugarizi no mu gusatira imbere yabarumuna babo.
Nubwo ikipe ya U-20 yabonye igitego cyo kwishyura, ntiyashoboye guhangana n’ubunararibonye, imbaraga ndetse n’umukino mwiza w’ikipe nkuru. Icyakora, uyu mukino uzabera isomo rikomeye aba bakinnyi bakiri bato bafite inzozi zo kuzamurwa mu ikipe nkuru.
Iyi ntsinzi ije mu gihe habura iminsi mike ngo habe Rayon Day 2026, ibirori bikomeye bihuriza hamwe abakunzi ba Rayon Sports. Uko ikipe yitwaye byarushijeho kongera icyizere n’ibyishimo mu bafana biteze ibihe byiza mu mwaka w’imikino utaha no guha ishaka abakinnyi bikipe nkuru.
About The Author
