Ishyirahamwe ry’Umupira w’Amaguru ku Isi (FIFA) ryamaganye ubutumwa bw’ihohoterwa, iterabwoba n’amagambo arimo urwangano bugera kuri miliyoni 7 bwajyaga ku mbuga nkoranyambaga bwibasira abakinnyi, amakipe, n’abatoza muri iki Gikombe cy’Isi cya 2026.
Ibi byavubuwe n’itsinda rishinzwe kurinda abakinnyi ku mbuga nkoranyambaga ryitwa Social Media Protection Service (SMPS).
Iri tsinda rigamije kurinda abakinnyi, amakipe n’abasifuzi ibitero byo kuri internet, ryagaragaje ko umubare w’ubutumwa bushobora guteza ikibazo bwabonetse muri iki Gikombe cy’Isi wikubye inshuro 14 ugereranyije n’icyabanje cyabaye mu 2022.
Mu Gikombe cy’Isi cya 2022, FIFA yakuyeho ubutumwa bugera kuy bihumbi 470 bwagaragayemo kwibasira abakinnyi n’abatoza.
Kuri iyi nshuro, itsinda rya SMPS ryasuzumye ubutumwa burenga ibihumbi 500 bwari bwagaragaye binyuze mu ikoranabuhanga ry’ubwenge buhangano, bukekwaho kwibasira abakinnyi, abatoza n’abayobozi.
FIFA yavuze kandi ko yashyikirije inzego zibishinzwe zirimo inzego z’umutekano, ibibazo birenga 1.000 biri mu rwego rwo kwibasira abakinnyi.
Kuva iki Gikombe cy’Isi cyatangira, SMPS imaze kugenzura ubutumwa busaga miliyoni 53 bwagiye bushyirwa ku mbuga nkoranyambaga.
FIFA yavuze ko ubutumwa bushingiye ku ivanguraruhu bugize 11% by’ubutumwa bwose bwagaragaye bwibasira abandi muri iki Gikombe cy’Isi.
Iri rushanwa rizasozwa n’umukino wa nyuma uzahuza Argentina na Espagne ku wa 19 Nyakanga 2026.
About The Author
