Mu Karere ka Gomba, mu Mudugudu wa Saali, havuzwe inkuru yateje amatsiko n’impaka mu baturage nyuma y’uko umwana w’umuhungu yavutse ku wa Mbere tariki ya 2 Gashyantare 2026, bikavugwa ko yavutse afashe umudali w’idini rya Gatolika ugaragaza Mutagatifu Antuwani wa Padua atwaye Umwana Yezu mu kiganza cye.
Ababyeyi b’uyu mwana bavuze ko byabateye gutungurwa bikomeye, cyane cyane nyina w’imyaka 30 watangaje ko atari yiteze kubona umwana avukana ikintu cy’icyuma mu ntoki, gusa akemeza ko yahise yizezwa n’abamufashije kubyara ko umwana ameze neza.
Umubyaza wamufashije na we yavuze ko mu myaka myinshi amaze mu mwuga wo gufasha ababyeyi kubyara, atigeze abona ibintu nk’ibyo, aho yemeje ko koko uwo mudali wabonetse wari mu ntoki z’umwana.
Abaturage baganiriye n’itangazamakuru bavuze ko uyu mwana agaragara nk’ukuze ugereranyije n’impinja zisanzwe uko zivuka zingana, bamwe bakemeza ko asa n’ufite ibyumweru cyangwa ukwezi kumwe nubwo yari amaze amasaha make avutse, ibi bikarushaho gukurura impaka n’ibitekerezo bitandukanye.
Se w’umwana we yavuze ko umuryango uri mu rujijo n’amarangamutima menshi, kuko bataramenya uko bakira ibyabaye, ndetse bikabagora no guhitamo izina ry’umwana bitewe n’uko inkuru imuvugwaho yateje impaka mu baturage.
Nubwo iyi nkuru yakwirakwiye ku mbuga nkoranyambaga no mu bitangazamakuru byo mu karere, inzego z’ubuzima n’izindi nzego bireba ntiziragira icyo zitangaza ku mugaragaro kiyemeza cyangwa gihakana ibyavuzwe, bityo abakurikiranira hafi iyi nkuru bagasabwa kuyakira mu bwitonzi, bagategereza ibisobanuro byimbitse by’ababifitiye ububasha, birinda kuyigira igitangaza cyemejwe mu gihe hakiri gukorwa iperereza n’isuzuma.
About The Author
