Nyuma y’iminsi hari kuvugwa umwuka utari mwiza muri Real Madrid na perezida wayo Perez akagirana ikiganiro n’itangazamakuru aho yavugiye amagambo akomeye, iyikipe yasohoye itangazo rihamagarira amatora ya Perezida n’inama nkuru y’ubutegetsi.
Iryo tangazo riragira riti:
Komisiyo y’Amatora, ishingiye ku biteganywa mu ngingo ya 38 y’amategeko agenga ikipe, yafashe icyemezo cyo gutumiza amatora ya Perezida n’Inama y’Ubutegetsi.
Iyi Komisiyo y’Amatora, hakurikijwe ingingo ya 40 y’ayo mategeko, itangaje ku mugaragaro itangira ry’ikorwa ry’amatora, rikazakorwa hakurikijwe gahunda n’amabwiriza akurikira:
Gutanga kandidatire: bizakorwa kuva ku itariki ya 14 Gicurasi kugeza ku ya 23 Gicurasi 2026 (harimo), hakurikijwe ibisabwa n’amasaha ateganywa n’amabwiriza y’amatora.
Kwemeza no gutangaza kandidatire: bizakorwa ku munsi ukurikiyeho nyuma yo gutanga buri kandidatire.
Ubujurire ku kandidatire zemejwe cyangwa zanzwe: bugomba gutangwa kuri Komisiyo y’Amatora, hakurikijwe amabwiriza, mu minsi ibiri (2) y’ingengabihe nyuma yo kumenyeshwa no gutangazwa kw’icyemezo.
Itariki y’amatora : mu gihe hazaba hari kandidatire zirenze imwe, Komisiyo y’Amatora izatangaza itariki n’aho amatora azabera.
Gutora hifashishijwe iposita: abanyamuryango bari ku rutonde rw’itora bemerewe gutora bakoresheje iposita, hakurikijwe ibisabwa n’amabwiriza y’amatora.
Urutonde rw’itora: abanyamuryango bashobora kureba niba bari ku rutonde cyangwa bataruriho kuva ku ya 14 kugeza ku ya 18 Gicurasi 2026 (harimo), banyuze ku rubuga rwa “Online Member Support Office (2026 Presidential Elections)” cyangwa ku biro bifasha abanyamuryango, kuva ku wa Mbere kugeza ku wa Gatanu, saa tatu za mu gitondo kugeza saa moya z’umugoroba.
Ibirego ku rutonde rw’itora: abanyamuryango bashobora gutanga ibirego bijyanye no kuba bari cyangwa batari ku rutonde rw’itora hagati ya 14 na 18 Gicurasi 2026, mu nyandiko bohereza kuri email y’ikipe cyangwa bakabishyikiriza ku biro bifasha abanyamuryango, kuva ku wa Mbere kugeza ku wa Gatanu, saa tatu za mu gitondo kugeza saa moya z’umugoroba.
About The Author
