Guverinoma ya Repubulika Iharanira Demokarasi ya Congo yafashe ingamba zikomeye zo gukumira ikwirakwira rya Ebola, ihagarika ibikorwa byose bihuza abantu benshi mu bice bitandukanye by’igihugu, harimo n’umurwa mukuru Kinshasa.
Iki cyemezo cyatangajwe na Minisitiri ushinzwe Umutekano, Jacquemain Shabani, mu gihe icyorezo cya Ebola gikomeje kwiyongera cyane mu ntara zo mu burasirazuba bw’igihugu zirimo Ituri, Kivu y’Amajyaruguru na Kivu y’Amajyepfo.
Imibare yatangajwe n’inzego z’ubuzima igaragaza ko kugeza ku wa 28 Kamena 2026, abantu barenga 1,300 bamaze kwandura Ebola, mu gihe abasaga 370 bamaze guhitanwa na yo. Abashinzwe ubuzima bavuga ko hakomeje gushyirwa imbaraga mu gukurikirana abanduye no gukaza ingamba zo gukumira ikwirakwira ry’iyo ndwara.
Ikigo cya Afurika gishinzwe gukumira no kurwanya indwara (Africa CDC) cyatangaje ko icyorezo cyari cyaratangiye gukwirakwira mbere y’uko gitangazwa ku mugaragaro, bituma habaho impungenge ko gishobora kugera no mu zindi ntara zegereye izamaze kugaragaramo ubwandu.
Mu rwego rwo kugabanya ibyago byo gukwirakwiza iyo ndwara, ubuyobozi bwafashe icyemezo cyo guhagarika ibikorwa byose bihuza abantu benshi, haba mu ntara zibasiwe ndetse no muri Kinshasa, umujyi utuwe n’abaturage benshi.
Icyakora, iki cyemezo cyateje impaka mu rwego rwa politiki, aho bamwe mu batavuga rumwe n’ubutegetsi bavuga ko gishobora no kugira ingaruka ku myigaragambyo bari bateganyije mu ntangiriro za Nyakanga, bagamije kugaragaza kutishimira gahunda yo kuvugurura Itegeko Nshinga.
Mu gihe ubuyobozi bushimangira ko izi ngamba zigamije kurinda ubuzima bw’abaturage, inzego z’ubuzima zikomeje gusaba abaturage kubahiriza amabwiriza yo kwirinda Ebola no kwihutira kwivuza igihe bagaragaje ibimenyetso byayo.
About The Author
