Ihuriro rya AFC/M23 ryatangaje ko ritemeranya na raporo iherutse gusohorwa n’umuryango uharanira uburenganzira bwa muntu, Human Rights Watch (HRW), riyishinja kubogama no kutagaragaza ishusho nyayo y’ibibera mu burasirazuba bwa Repubulika Iharanira Demokarasi ya Congo.
Mu itangazo ryashyizwe ahagaragara ku wa 10 Kamena 2026, AFC/M23 yavuze ko iyo raporo yibanze cyane ku birego biyiregwa, ariko ikirengagiza cyangwa igatesha agaciro ibikorwa bibi ivuga ko bikorwa n’ingabo za leta ya Congo n’imitwe bazafatanya.
Iri huriro ryahakanye byimazeyo ibirego byo kwinjiza abaturage mu gisirikare ku gahato. Ryasobanuye ko ibikorwa byo kwakira abinjira mu ngabo zabyo bikorwa ku mugaragaro kandi bikamenyekana n’abaturage, bityo ritavuga rumwe n’abemeza ko haba harabayeho guhatira abantu kwinjira mu gisirikare.
AFC/M23 yavuze kandi ko muri iki gihe amakuru akwirakwira vuba binyuze ku mbuga nkoranyambaga no kuri telefone ngendanwa, bityo hakwiye kwifashishwa ibimenyetso byinshi bitangwa n’ababaye hafi y’ibikorwa mbere yo gufata imyanzuro.
Ku rundi ruhande, Human Rights Watch muri raporo yayo ivuga ko AFC/M23 hamwe n’Ingabo z’u Rwanda bakoze ibikorwa bishobora gufatwa nk’ibyaha by’intambara mu nkambi za gisirikare zo mu Ntara ya Kivu y’Amajyaruguru. Uyu muryango uvuga ko wakoze iperereza rishingiye ku buhamya bw’abantu benshi, harimo abahoze bafunzwe.
Raporo ivuga ko nyuma y’ifatwa ry’Umujyi wa Goma mu ntangiriro za 2025, hari abaturage n’abakozi ba leta bivugwa ko bajyanywe mu nkambi za gisirikare ku gahato. Icyakora, ibyo birego byose AFC/M23 yarabihakanye.
HRW ntiyagarukiye kuri AFC/M23 gusa, kuko yanenze na Guverinoma ya Congo, iyishinja gukorana no gutera inkunga imitwe yitwaje intwaro irimo FDLR n’amwe mu matsinda ya Wazalendo akekwaho ihohoterwa rikorerwa abaturage.
Uyu muryango wasabye ubutegetsi bwa Kinshasa guhagarika ubufasha buhabwa iyo mitwe no gushyiraho iperereza ryigenga ryakurikirana ibyaha bishinjwa impande zose ziri mu ntambara.
Raporo isoza ivuga ko kugeza igihe yasohokeraga, AFC/M23 n’u Rwanda bitari byaratanga ibisobanuro ku bibazo HRW yari yabibajije mbere yo kuyitangaza.
About The Author
