Mu gihe benshi bari bazi ko umushinga wa filime y’amateka “La Casa de Papel” (Money Heist) washyiriweho akadomo mu mwaka wa 2021, urubuga rwa Netflix rwatunguranye rwemeza ko iyi nkuru ikomeje mu cyiswe “Money Heist Universe”. Nyuma y’imyaka itanu y’izihirwa n’ibice byabanje, ubu ubutumwa bushya bwagaruye amatsiko n’imyiteguro idasanzwe mu bakunzi ba sinema hirya no hino ku Isi.
Uru rugendo rw’ibitangaza rwatangiye mu buryo buciriritse mu mwaka wa 2017, ubwo iyi filime yerekanwaga bwa mbere kuri shene ya Antena 3 yo muri Espagne. Icyo gihe ntiyahise ihabwa agaciro kageze ku rwego mpuzamahanga, kugeza ubwo Netflix yayiguraga ikayigeza ku Isi yose. Kuva ubwo, yabaye imwe mu mafilime make zabashije kugira abafana (fanbase) benshi kandi b’indahemuka, bitewe n’ubuhanga bw’uwayanditse ndetse n’imikinire idasanzwe y’abakinnyi nka ‘The Professor’, ‘Tokyo’ n’abandi.
Netflix iherutse gushyira hanze amashusho magufi (teaser) akaba n’isezerano ku bakunzi b’iyi filime. Muri ayo mashusho, Netflix yagize iti: “Byose byatangiye ari amafaranga maze biba zahabu n’ubutunzi butagira igiciro. Impinduramatwara ntirarangira.” Ayo magambo yashimangiye ko nubwo inkuru y’ubujura bwa Banki ya Espagne yari yararangiye muri season ya gatanu, ubu hagiye kuza ibindi bice bishya bizasobanura byimbitse uyu muryango.
Nubwo amakuru arambuye ku bijyanye n’aho inkuru izerekeza n’abakinnyi bashya bazayigaragaramo akiri ibanga rikomeye, itariki yo kuyishyira hanze yamaze kumenyekana. Biteganyijwe ko ku wa 15 Gicurasi 2026, ari bwo agace gashya k’uyu mushinga kazagezwa ku bafatanyabikorwa n’abakunzi ba Netflix.
Iri tangazo ryasize ibibazo byinshi mu mitwe y’abantu: Ese uyu mushinga mushya uzibanda ku mateka y’abakinnyi twari tuzi (spin-offs), cyangwa ni amaraso mashya agiye kwinjira mu rugamba rwo gushaka ubutunzi? Icyizere cyo ni cyose ko ubu bwisungane bushya buzongera gushyira iyi filime ku mwanya wa mbere mu zirebwa cyane ku Isi.
About The Author
