Inkuru ikomeje kugarukwaho cyane mu myidagaduro mu Rwanda ni iy’itandukana ritunguranye rya Iranzi The Rapper n’umuryango Sherrie Silver Foundation wari umaze gushinga imizi mu gufasha uyu mwana ukiri muto ufite impano mu rurimi rw’ikiraperi no mu kubyina.
Iri seswa ry’imikoranire ryateje urujijo rushingiye ku kuba impande zombi zitavuga rumwe ku cyiciro cy’amakosa cyabyaye uyu mwanzuro.Ku ruhande rw’ubuyobozi bwa Sherrie Silver Foundation, banyujije itangazo rigenewe abagenerwabikorwa babo ku mbuga nkoranyambaga, bamenyesha abantu ko bahagaritse gukorana na Iranzi.
Uyu muryango wagaragaje ko n’ubwo bishimiye igihe bamaranye na we, ibyemezo byabo bishingira ku ndangagaciro z’ibanze nk’imyitwarire myiza, kwiga, n’ubunyangamugayo; ibyo bose bavuze ko biza imbere y’impano iyo ari yo yose y’ubuhanzi.
Ibi ariko siko Iranzi The Rapper abibona. Mu biganiro yagiranye n’itangazamakuru, uyu musore ukiri muto yavuze ko ahubwo ari we wafashe ikaramu ku wa 2 Gicurasi 2026, akandika ibaruwa isezera mu muryango kubera kunanizwa.
Iranzi ashinja uyu muryango kumubuzamo ubwisanzure bwo kwagura impano ye no gukora umuziki nk’umuhanzi wigenga, avuga ko ahubwo bageragezaga kuzimya urumuri rwe.Mu kugaragaza amwe mu manyanga abona ko yakoreshwaga mu kumuca intege, Iranzi yavuze ko koherezwa kwe mu kigo gicumbikira abanyeshuri cya Sunrise i Musanze (aho yari ageze mu mwaka wa gatatu) kwari ukugira ngo atabona umwanya n’ubwisanzure byo gukora muzika.
Yongeyeho ko ndetse n’igihe babaga basabwe kwandika indirimbo ngo bazishyikirize Sherrie Silver Foundation kugira ngo ihitemo izikwiye gufatwa, izo yabaga yanditse zose zangwaga nta mpamvu, bikamugaragariza ko ari umugambi wo kumuzitira.
Izi mpande zombi zitandukanye nyuma y’aho uyu muhanzi ashyiriye hanze indirimbo ye ya mbere yise ‘Basalee’. Kubera izi mbogamizi, Iranzi ntabwo yasezereye umuryango gusa, ahubwo yahise ahindura n’ishuri ava i Musanze yerekeza i Kigali mu cyiciro cy’abiga bataha, mu rwego rwo gushaka umwanya uhagije ndetse n’ubwigenge bwo gukurikirana umuziki we.
About The Author
