Imyidagaduro n’umupira w’amaguru byahujwe n’ikibazo gikomeye nyuma y’aho umunyamerika w’icyamamare ku mbuga nkoranyambaga, IShowSpeed, avuze ko yakorewe ivanguraruhu n’umufana w’ikipe ya Argentine. Ibi byabereye kuri Hard Rock Stadium ku wa 3 Nyakanga 2026, ubwo uyu musore yari yitabiriye umukino w’Igikombe cy’Isi wahuzaga Argentine na Cabo Verde.
Ubwo IShowSpeed yari yambaye umwambaro w’ikipe ya Cabo Verde ndetse akaba ari kwerekana umukino imbonankubone kuri YouTube, amashusho ye yafashe uko yagiye mu kutumvikana n’umufana wa Argentine.
Muri ayo mashusho, yumvikanye ashinja uyu mufana kumubwira amagambo ashingiye ku ivanguraruhu, ibintu byahise bitangira gucicikana ku mbuga nkoranyambaga.
Mu itangazo ryamaze gusohoka mu ijoro ryo ku wa Kabiri, FIFA ntiyatinze kugaragaza aho ihagaze. Iri shyirahamwe ryatangaje ko ryatangiye iperereza ryihuse, ryongeraho ko “ritazemera na gato ivanguraruhu, urwango cyangwa ivangura iryo ari ryo ryose.” FIFA yongeye kwibutsa isi ko Igikombe cy’Isi kigamije guhuza abantu, kwimakaza ubumwe, kubahana no kwakirana, bityo ko ibikorwa nk’ibyo nta mwanya bifite muri uyu mukino.
Ku kibuga, umukino ubwawo wari wuje ishyaka rikomeye. Argentine yaje gusezerera Cabo Verde ku bitego 3-2. Ibi byabaye nyuma y’uko iminota 90 y’umukino irangiye amakipe yombi anganya igitego 1-1, bityo hitabazwa iminota y’inyongera ari na yo Argentine yabonoyemo intsinzi.
IShowSpeed akomeje kuba umwe mu banyabigwi bafite ijambo ku mbuga nkoranyambaga ku isi, aho afite abarenga miliyoni 56 kuri YouTube ndetse na miliyoni 53 kuri TikTok. Azwiho ubushobozi bwo gutambutsa ibirori bya siporo ku buryo bwa “Live,” ndetse akaba ari n’inshuti ya hafi ya siporo ku buryo yigeze no kwakira Perezida wa FIFA, Gianni Infantino, mu kiganiro cyagarutse ku hazaza h’umupira w’amaguru.
About The Author
