Abantu nibura 50, benshi muri bo bakaba ari abana, bapfiriye mu mpanuka y’ubwato bwarohamye mu majyaruguru y’uburengerazuba bwa Nigeria, muri Leta ya Sokoto.
Ubwo bwato bwari butwaye abahinzi n’abandi bakozi bari bagiye mu mirimo yo gusarura umuceri. Abatangabuhamya batandukanye batanze imibare itandukanye y’abari muri ubwo bwato, aho bamwe bavuga ko bari barenga 70, mu gihe abandi bavuga ko bari 57.
Umwe mu bayobozi bashinzwe ibikorwa by’ubutabazi yavuze ko imirambo myinshi yamaze kuboneka. Muri yo harimo iy’abana bari bafite hagati y’imyaka 10 na 15. Abantu 16 bo bararokotse iyi mpanuka.
Nubwo hataratangazwa umubare nyawo w’abari muri ubwo bwato, impanuka yasize umubare munini w’abantu bapfuye ndetse ikomeje guteza impungenge ku mutekano w’ingendo zo mu mazi muri Nigeria.
Impanuka z’ubwato zikunze kuba muri Nigeria, cyane cyane mu gihe cy’imvura. Zimwe mu mpamvu zikunze kuvugwa ni ubwikorezi bw’abantu burenze ubushobozi bw’ubwato, kutitabwaho neza kw’ubwato ndetse n’ubugenzuzi budahagije ku mutekano wo mu mazi.
Abayobozi bakomeje ibikorwa byo gushakisha no gutabara, mu gihe amakuru arambuye ku cyateye ubwato kurohama n’umubare nyawo w’abahitanywe n’iyi mpanuka agitegerejwe.
About The Author
