Ikigo cy’Igihugu gishinzwe Indangamuntu (NIDA) cyatangije ku mugaragaro igikorwa cyo kwemeza imyirondoro no gufotora abatuye Umujyi wa Kigali, mu rwego rwo gutanga indangamuntu z’ikoranabuhanga (SSDID). Iki gikorwa kigamije kuvugurura no kunoza amakuru y’irangamimerere y’abaturage hashingiwe ku byatangajwe n’ubuyobozi bwa NIDA n’Umujyi wa Kigali.
Iyi gahunda yatangiye ku wa 7 Gashyantare 2026, ikorerwa mu Turere twose tugize Umujyi wa Kigali, yitabiriwe n’abayobozi mu nzego z’ibanze n’abahagarariye NIDA. Biteganyijwe ko ibikorwa bizajya byimuka buri cyumweru, bigakorerwa mu Mirenge itandukanye kugeza abaturage bose bagezweho.
Mu cyiciro cya mbere, igikorwa cyatangirijwe mu Mirenge ya Gitega, Nyakabanda na Rwezamenyo mu Karere ka Nyarugenge; Kagarama, Kicukiro na Niboye mu Karere ka Kicukiro; ndetse na Kimihurura na Kacyiru mu Karere ka Gasabo. Icyo cyiciro kizakomeza kugeza ku wa 15 Gashyantare 2026.
Abaturage basabwa kwitabira bitwaje ibisabwa birimo indangamuntu basanganywe, nimero z’indangamuntu z’ababyeyi, iz’abo bashakanye ku babafite, ndetse na nimero z’abana banditse mu irangamimerere.
NIDA isobanura ko serivisi itangirwa aho site iri hose hegereye umuturage, bitagombye kuba aho yafatiye indangamuntu mbere.
Iki gikorwa gikorerwa kuva saa moya za mu gitondo kugeza saa kumi n’imwe z’umugoroba, buri munsi kuva ku wa Mbere kugeza ku Cyumweru. Ubuyobozi buvuga ko amasaha yongerewe kugira ngo abaturage benshi babashe kubona serivisi batabangamiwe n’akazi ka buri munsi.
Umuvugizi w’Umujyi wa Kigali, Emma Claudine Ntirenganya, yatangaje ko n’abatuye mu Mirenge itaragerwamo bazagerwaho mu byiciro bikurikira. Yasobanuye ko n’uwacikanywe na gahunda mu Murenge we ashobora kujya ku yindi site iri hafi ye agakorerwa serivisi adasabwe aho asanzwe atuye.
Ati “Buri cyumweru tuzajya tugenda duhindura, ni ukuvuga ngo ubu aho turahari kuva tariki 7 kugera kuri 15, noneho mu cyumweru cya kabiri kuva tariki 17 kugera kuri 22 tuzajya mu yindi Mirenge.
Ariko bizaba binasobanuye ko n’iyo wowe waba waracikanywe muri wa Murenge, ntabwo byakubuza kujya mu wundi Murenge byakomerejemo. Icy’ingenzi ni uko ujyayo ntabwo bazakubaza ngo wari utuye hehe, ahubwo uragenda ukuzuza ya myirondoro, ugafotorwa, ugakorerwa n’ibindi byose.”
Umuyobozi Mukuru wa NIDA, Josephine Mukesha, yasabye abaturage kwitabira ku bwinshi, bakazazana n’abana babo, kuko hari n’iminsi ya weekend yashyizweho kugira ngo byorohereze abakozi n’abanyeshuri. Yanavuze ko hari n’ahazajya hakora amasaha y’inyongera bitewe n’ubufatanye n’inzego z’ibanze.
NIDA igaragaza ko zimwe mu mbogamizi zirimo kuboneka ari izijyanye n’abana batanditswe mu irangamimerere hakiri kare, ndetse n’abashakanye byemewe n’amategeko ariko amakuru yabo atarashyirwa neza mu nyandiko z’irangamimerere. Abo bose basabwa kubanza gukosora ayo makuru mbere yo kwitabira igikorwa cyo kwemeza imyirondoro no gufotorwa.
Ababishoboye kandi bashobora kubanza kuzuza ifishi y’imyirondoro banyuze ku rubuga rwa Irembo bakoresheje murandasi, bakazajya kuri site bakeneyeho gufotorerwa gusa. Indangamuntu y’ikoranabuhanga izajya itangwa mu buryo bw’ikarita isanzwe, hakiyongeraho na QR Code n’umubare wihariye (token) bifasha kubona amakuru y’umuntu mu buryo bworoshye kandi bugezweho.
About The Author
