Mu cyumweru cya kabiri cya Gicurasi 2026, Umujyi wa Kigali wongeye kugaragaza ko ari wo mutima w’ibiganiro bigamije impinduka muri Afurika.
Ku wa Gatatu tariki ya 13 Gicurasi, Village Urugwiro yakiriye Abakuru b’Ibihugu batandukanye baje kwitabira inama ya Africa CEO Forum.Iyi nama yatangiye mu 2012 ibaye ku nshuro ya 13, ikaba itegurwa na Groupe Jeune Afrique ifatanyije na Rainbow Unlimited mu guhuza abari ku isonga mu bukungu bwa Afurika kugira ngo baganire ku buryo bwo guteza imbere ubucuruzi, ishoramari n’ubufatanye hagati y’ibihugu bya Afurika.
Ibi biganiro byihariye byabanjirije inama nyir’izina, ntibishimangira gusa umubano mwiza w’u Rwanda n’amahanga, ahubwo binagaragaza icyerekezo gishya cy’ubufatanye hagati y’ibihugu bya Afurika.
Mubyo Perezida Paul Kagame yagezeho muri uyu munsi, harimo kwakira abayobozi b’ibihugu bifite amateka n’ubushobozi bitandukanye. Ibiganiro na Perezida Bola Ahmed Tinubu wa Nigeria byibanze ku gutsura umubano n’igihugu gifite ubukungu bunini muri Afurika y’Uburengerazuba.
Ku rundi ruhande, kwakira Perezida Daniel Chapo wa Mozambique byashimangiye ubutwererane bwihariye bushingiye ku mutekano n’ishoramari, mu gihe Perezida Mohamed Ould Ghazouani wa Mauritania yibanze ku mutekano n’inyungu mpuzamahanga Afurika ihuriyeho.
Uku kwakira abashyitsi mu muhezo ni ikimenyetso cy’uko u Rwanda rukomeje kuba umuhuza w’amahanga n’umusemburo w’amahoro n’ubucuruzi.
Inama ya Africa CEO Forum ubwayo, ibaye ku nshuro ya 13, ni urubuga rurenga imvugo rugashyira mu bikorwa imishinga itandukanye. Yahuje abasaga 2,500 barimo abayobozi b’ibigo by’ubucuruzi n’abashoramari, itanga ubutumwa bukomeye bw’uko Afurika igomba kwagura ubushobozi bwayo mu buryo bwihuse.
Intego yo kwikura mu cyiciro bise “Scale of Fail” (icyiciro cyo gusigara inyuma mu bukungu bw’isi), igaragaza ko abayobozi b’ibigo n’ab’ibihugu bamenye ko ubufatanye ari ryo shingiro ryo guhangana ku isoko mpuzamahanga.
Kuba u Rwanda rwaratoranyijwe kwakira iyi nama inshuro zirenze imwe si impanuka. Ni umusaruro w’imyaka itari mike yo kubaka imiyoborere myiza, umutekano usesuye, n’ibikorwa remezo bigezweho bituma abashyitsi bisanga.
Impuguke mu by’ubukungu zibona iyi nama nk’irembo ryo gusinya amasezerano y’ishoramari azatuma u Rwanda rurushaho kuba igicumbi cy’ubucuruzi mu Karere.
Mu gusoza, ruzinduko rw’aba bakuru b’ibihugu n’itangira rya Africa CEO Forum i Kigali, bitanga icyizere cy’uko Afurika iri kwishakira ibisubizo bishingiye ku bufatanye bw’inzego za leta n’iz’abikorera. Iyo ibihugu bifatanyije mu mutekano no mu bucuruzi, nk’uko byagaragaye mu biganiro byabereye mu Rugwiro, biba byubaka Afurika ikomeye, ishobora guhagarara bwuma imbere y’izindi nzego z’ubukungu ku isi.
About The Author
