Guverinoma ya Repubulika Iharanira Demokarasi ya Congo (RDC) yatangaje ko itazemera abayobozi bashya b’ibigo by’amashuri makuru na za kaminuza bashyizweho n’ubuyobozi bwa AFC/M23 mu mijyi ya Goma na Bukavu.
Minisiteri y’Amashuri Makuru, Kaminuza, Ubushakashatsi n’Ubuhanga (ESU-RSI) yavuze ko izo mpinduka nta gaciro zifite mu mategeko, kuko ububasha bwo gushyiraho abayobozi b’ibigo bya Leta buri mu maboko y’inzego za Leta ya RDC.
Iyi Minisiteri yatangaje uyu mwanzuro ku wa Mbere, tariki ya 10 Kanama 2026, nyuma y’uko AFC/M23 itangaje amazina y’abayobozi bashya ku wa Gatanu, tariki ya 7 Kanama.
Kinshasa ivuga ko kugenzura igice runaka cy’ubutaka bw’igihugu bidaha AFC/M23 ububasha bwo gufata ibyemezo bireba imiyoborere y’ibigo bya Leta.
Mu bigo by’amashuri makuru byavuzwe muri izi mpinduka harimo Institut Supérieur de Commerce de Goma, Institut Supérieur des Techniques Médicales de Goma, Institut Supérieur Pédagogique de Goma, Institut Supérieur de Développement Rural de Bukavu, ISTM/Bukavu ndetse na Université Officielle de Bukavu.
ESU-RSI yashimangiye ko abayobozi bari basanzwe barashyizweho n’ubutegetsi bwa RDC bakomeza imirimo yabo kandi ko ari bo bafite ububasha bwo gukomeza kuyobora ibyo bigo.
Guverinoma kandi yihanangirije abakozi b’amashuri makuru n’abandi bantu bashobora kugerageza gushyira mu bikorwa izi mpinduka, ibibutsa ko bashobora kubiryozwa n’amategeko.
Aya makimbirane ku micungire y’amashuri makuru aje nyuma y’izindi mpinduka AFC/M23 yari yatangiye gushyira mu bikorwa mu bice igenzura. Muri Gicurasi 2026, uwo mutwe wasabye ibigo by’amashuri makuru byo muri ibyo bice kugabanya cyangwa guhagarika imikoranire na Minisiteri ibishinzwe ikorera i Kinshasa.
AFC/M23 kandi yari yatangiye gushyiraho uburyo bwihariye bwo gukurikirana imikorere y’ibigo by’amashuri makuru, mu gihe inzego zayo mu ntara zagiraga uruhare mu bijyanye n’imicungire y’amafaranga y’ishuri.
Iki kibazo cyongeye kugaragaza amakimbirane hagati ya guverinoma ya RDC n’ubuyobozi bwa AFC/M23 ku bijyanye n’imiyoborere y’ibice byo mu burasirazuba bw’igihugu, aho impande zombi zikomeje kutumvikana ku bubasha bwo gufata ibyemezo mu nzego za Leta n’ibigo bya Leta.
About The Author
