Nibura abasirikare 23 b’Igihugu cya Chad bishwe, mu gihe abandi 26 bakomeretse, mu gitero cyagabwe n’umutwe w’iterabwoba wa Boko Haram ku kigo cya gisirikare kiri mu karere k’Ikiyaga cya Chad.
Igisirikare cya Chad cyatangaje ko iki gitero cyabaye mu ijoro ryo ku wa Mbere, kigabwa ku kirwa cya Barka Tolorom kiri mu Kiyaga cya Chad, ahantu hakunze kubera ibikorwa by’imitwe yitwaje intwaro.
Uyu mutwe wa Boko Haram ukorera cyane muri Nigeria, umaze igihe uteza umutekano muke mu bihugu bikikije Ikiyaga cya Chad birimo Cameroon, Chad, Niger na Nigeria. Nubwo wagabye igitero gikomeye, igisirikare cya Chad cyavuze ko cyabashije kwirwanaho kikica umubare munini w’abo bagabye igitero.
Perezida wa Chad, Mahamat Idriss Deby Itno, yamaganye bikomeye iki gitero, avuga ko ari igikorwa cy’ubugwari cyakozwe n’uyu mutwe w’iterabwoba. Mu butumwa yashyize ku rubuga rwe rwa Facebook, yihanganishije imiryango y’abasirikare bapfiriye muri icyo gitero, anizeza ko urugamba rwo kurwanya Boko Haram ruzakomeza kugeza burundu.
Yagize ati: “Tuzakomeza kurwana dufite imbaraga nshya kugeza ubwo iri terabwoba rizaba ricitse burundu.”
Mu minsi ishize, ibikorwa bya Boko Haram byongeye kwiyongera mu karere k’Ikiyaga cya Chad, cyane cyane ibitero bikorwa n’agatsiko kayo ka JAS, kagabye ibitero birimo gushimuta abantu no kwibasira ibigo bya gisirikare biri ku birwa no ku nkengero z’iki kiyaga.
Si ubwa mbere abasirikare ba Chad bagabwaho ibitero bikomeye. Mu Ukwakira 2024, igitero nk’iki cyahitanye abasirikare bagera kuri 40. Nyuma y’icyo gitero, Perezida Déby yahise atangiza ibikorwa bya gisirikare byo guhashya uyu mutwe, ndetse avuga ko azabyiyoborera ku rugamba ku giti cye mu gihe cy’ibyumweru bibiri.
Nubwo icyo gikorwa cyarangiye mu ntangiriro za 2025, igisirikare cya Chad cyari cyatangaje ko Boko Haram itagifite aho yihishira ku butaka bw’icyo gihugu. Gusa, ibirwa n’ibishanga byo mu Lake Chad bikomeje kuba ubuhungiro bw’imitwe y’iterabwoba, harimo n’ishami rya ISIL rikorera muri Afurika y’Iburengerazuba (ISWAP).
Chad ni igihugu kimaze imyaka myinshi gihanganye n’umutekano muke uterwa n’intambara z’imbere mu gihugu, imitwe yitwaje intwaro n’ihindagurika ry’ubutegetsi. Nubwo gifite umutungo wa peteroli, gikomeje kuba mu bihugu bikennye cyane muri Afurika bitewe n’ubukungu budakura n’ikirere kigoye.
About The Author
